حیدرآباد: ٹالی ووڈ کے مشہور مزاحیہ اداکار [en]Fish Venkat[/en] گردے فیل ہونے کے باعث انتہائی تشویشناک حالت میں اسپتال میں زیر علاج ہیں، اور ان کے خاندان نے علاج کے اخراجات کے لیے مالی امداد کی اپیل کی ہے۔
فِش وینکٹ کو ان کی بگڑتی ہوئی صحت کے بعد بوڈاوپّل کے آر بی ایم اسپتال میں داخل کروایا گیا ہے۔ اہل خانہ کے مطابق، وہ اب اپنے قریبی رشتہ داروں کو پہچاننے کے قابل بھی نہیں رہے ہیں۔
ان کی بیٹی شراونتی نے بتایا کہ ڈاکٹروں نے فوری طور پر گردے کی پیوند کاری کو ناگزیر قرار دیا ہے، لیکن خاندان کے پاس علاج کے لیے درکار مالی وسائل موجود نہیں ہیں۔ انہوں نے عوام سے اپیل کی کہ وہ آگے آ کر مدد فراہم کریں تاکہ وینکٹ کی جان بچائی جا سکے۔
فِش وینکٹ پچھلے کئی مہینوں سے گردوں کے عارضے میں مبتلا تھے اور اس دوران ڈائلیسس بھی کروایا جا رہا تھا۔ ان کی حالت مزید بگڑنے پر انہیں آئی سی یو میں منتقل کیا گیا ہے۔
یاد رہے کہ اس سے قبل آندھرا پردیش کے نائب وزیراعلیٰ اور اداکار پون کلیان نے ان کے علاج کے لیے 2 لاکھ روپئے کی مالی مدد فراہم کی تھی۔
