حیدرآباد: تلنگانہ کے وزیر آبپاشی این اُتم کمار ریڈی نے کہا ہے کہ ریاستی حکومت نے آندھرا پردیش کی مجوزہ گوداوری -بناکا چرلہ لنک پراجکٹ کو مؤثر طریقے سے روک دیا ہے۔ انہوں نے بتایا کہ مرکزی وزارت ماحولیات کے تحت کام کرنے والی ماہرین کی جانچ کمیٹی نے واضح طور پر کہا ہے کہ اس پراجکٹ کو ماحولیاتی منظوری نہیں دی جا سکتی۔ [en]Godavari project[/en] پر اس موقف کو تلنگانہ کی ایک بڑی کامیابی کے طور پر پیش کیا جا رہا ہے۔
اُتم کمار ریڈی کے مطابق، چیف منسٹر اے ریونت ریڈی کی قیادت میں تلنگانہ حکومت نے اس پراجکٹ کے خلاف مرکز سے مضبوط اعتراضات درج کروائے، جس کے نتیجے میں مرکزی حکومت نے یہ فائل آندھرا پردیش کو واپس کر دی۔
وزیر آبپاشی نے مزید کہا کہ مرکز نے آندھرا پردیش حکومت سے گوداوری طاس میں سیلابی پانی کی مکمل تفصیلات پیش کرنے کو بھی کہا ہے۔ انہوں نے کہا کہ گوداوری -بناکا چرلہ تجویز پر پہلے ہی شکایات موصول ہوئی تھیں، جن میں کہا گیا تھا کہ یہ منصوبہ گوداوری ٹریبونل ایوارڈ کی خلاف ورزی کرتا ہے۔
اُتم کمار ریڈی نے بتایا کہ مرکز نے آندھرا پردیش کو واضح کر دیا ہے کہ اس پراجکٹ کو مرکزی آبی کمیشن اور دیگر متعلقہ اداروں کی منظوری کے بغیر آگے نہیں بڑھایا جا سکتا۔
