حیدرآباد: حیدرآباد نارکوٹکس انفورسمنٹ ونگ (ایچ این ای ڈبلیو) کی خفیہ اطلاع پر شہر کی پولیس نے 10 اگست کو لنگر ہاؤس میں ایک کوکین سپلائر اور ایک خریدار کو گرفتار کر کے 15 گرام کوکین اور دو موبائل فون ضبط کر لیے، جن کی مالیت تقریباً 3.95 لاکھ روپئے بتائی گئی ہے۔
گرفتار ملزمان میں 33 سالہ موہت سنجے میہرا، جو نرسنگی حیدرآباد کا رہائشی اور اصل میں ممبئی سے تعلق رکھتا ہے، اور 28 سالہ خریدار ناگرم جیسن راج، جو پدماراؤ نگر، سکندرآباد کا ایک نجی ملازم ہے، شامل ہیں۔
Hyderabad Narcoticsپولیس کے مطابق میہرا نے مکینیکل انجینئرنگ میں بی ٹیک کیا ہے اور 2021 میں اپنا کاروبار بڑھانے کے ارادے سے حیدرآباد منتقل ہوا۔ طلاق کے بعد وہ پبز میں منشیات کا عادی ہوگیا اور اسی لت نے اسے سپلائی کے دھندے میں دھکیل دیا۔ گزشتہ پانچ ماہ سے وہ ممبئی سے فی گرام 10,000 روپئے میں کوکین خرید کر حیدرآباد میں فی گرام 25,000 روپئے میں فروخت کر رہا تھا، تاکہ مہنگی طرزِ زندگی کے لیے زیادہ آمدنی حاصل کر سکے۔
پولیس نے اس کے خلاف لنگر ہاؤس پولیس اسٹیشن میں کرائم نمبر 171/2025 درج کیا ہے، جس میں این ڈی پی ایس ایکٹ 1985 کی دفعات 8(سی)، 22(بی) اور 27(بی) شامل ہیں۔
ایچ این ای ڈبلیو نے عوام کو متنبہ کیا کہ تعلیم یافتہ پیشہ ور بھی منشیات کے استعمال اور اس کی سپلائی میں ملوث ہو رہے ہیں۔ ادارے نے والدین پر زور دیا کہ وہ اپنے بچوں کی عادات پر نظر رکھیں اور کسی بھی منشیات سے متعلق سرگرمی کی اطلاع 8712661601 پر دیں۔ اس کارروائی کی قیادت انسپکٹر ایس بالا سوامی نے کی، جبکہ سب انسپکٹر بی منوج کمار اور سب انسپکٹر سید منور علی (لنگر ہاؤس پولیس اسٹیشن) بھی شریک تھے۔ ڈی سی پی وائی وی ایس سدھیرندرا نے اس گرفتاری کی نگرانی کی۔
