حیدرآباد: تلنگانہ اسٹیٹ کونسل آف ہائر ایجوکیشن نے تمام سرکاری یونیورسٹیوں میں انڈر گریجویٹ کورسز کیلئے یکساں English syllabus کی منظوری دے دی ہے، جو تعلیمی سال 2025–26 سے نافذ العمل ہوگا۔
یہ فیصلہ پیر کو منعقدہ ایک جائزہ اجلاس میں لیا گیا، جس میں سرکاری یونیورسٹیوں کے انگریزی شعبہ جات کے سربراہان اور بورڈ آف اسٹڈیز چیئرمین شریک ہوئے۔ کونسل کے چیئرمین پروفیسر وی بالا کرشنا ریڈی نے بتایا کہ اس نئے نصاب کا مقصد مختلف یونیورسٹیوں کے درمیان فرق کو ختم کرنا، تعلیمی مساوات کو فروغ دینا اور معیاری تعلیمی نتائج کو یقینی بنانا ہے۔
نئے انگریزی نصاب میں درج ذیل نکات شامل ہوں گے:
‘مقامی سطح کے ساتھ انگریزی’ — روزمرہ زندگی، ملازمت، ڈیجیٹل خواندگی اور تخلیقی اظہار سے متعلق عملی زبان پر زور
سادہ اور جامع مواد — کم مقدار، زیادہ وضاحت؛ مہارت پر مبنی سیکھنے کو ترجیح
ثقافتی مطابقت — تلنگانہ کی تاریخ اور ثقافت پر مبنی مطالعہ مواد
مہارت کا امتزاج — سننے، بولنے، پڑھنے، لکھنے، گرامر اور الفاظ کا مربوط نصاب
ڈیجیٹل رسائی — معیاری پی ڈی ایف ریڈنگ میٹریل، آڈیو کلپس کے ذریعے تلفظ کی رہنمائی
اساتذہ کی تربیت — ٹی ایس سیٹ کے تحت نصاب کی تدریس، ڈیجیٹل مواد اور تشخیص پر تربیتی نشستیں
یہ نصاب قومی تعلیمی پالیسی 2020 کے فریم ورک کے مطابق تیار کیا جا رہا ہے، جس میں انگریزی مہارت کو دیگر مضامین سے جوڑا جائے گا۔ تعلیم مرحلہ وار اور نتائج پر مبنی ماڈیولز پر مشتمل ہوگی۔ تقریباً 200 صفحات پر مشتمل مطالعہ مواد ڈیجیٹل فارمیٹ میں فراہم کیا جائے گا، جبکہ ماڈل سوالیہ پرچے اور آڈیو اسباق کونسل کی ویب سائٹ پر دستیاب ہوں گے۔
کونسل نے بتایا کہ تمام مواد تجربہ کار ماہرین تعلیم کی نگرانی میں تیار کیا جا رہا ہے، تاکہ سادہ زبان، رسائی، اور عملی زندگی سے مطابقت کو یقینی بنایا جا سکے۔
About the Author
