حیدرآباد: ایک انڈیگو پرواز، جو بنگلورو سے حیدرآباد کے لیے روانہ ہوئی تھی، کو منگل کی رات تکنیکی خرابی کے باعث آندھرا پردیش کے گناورم ہوائی اڈہ پر [en]Emergency Landing[/en] کرنا پڑی۔ پرواز میں تقریباً 200 مسافر سوار تھے۔
ذرائع کے مطابق، پرواز کے بنگلورو سے روانہ ہونے کے کچھ ہی دیر بعد پائلٹوں نے تکنیکی مسئلہ محسوس کیا اور ہنگامی پروٹوکول کے تحت طیارے کا رخ گناورم کی طرف موڑا۔ پائلٹس نے فوری طور پر گناورم کنٹرول ٹاور سے رابطہ کر کے ہنگامی لینڈنگ کی اجازت طلب کی۔
طیارہ بحفاظت اتار لیا گیا اور کوئی حادثہ پیش نہیں آیا۔ ہوائی اڈہ کے حکام نے بتایا کہ پائلٹس کے بروقت الرٹ کے باعث گراؤنڈ اسٹاف نے فوری طور پر ہنگامی صورتحال سے نمٹنے کی تیاری کر لی تھی۔
تمام مسافر محفوظ رہے، جبکہ پرواز کو روکنے کے بعد انجنئیرز نے طیارے کا معائنہ شروع کر دیا۔
قابل ذکر ہے کہ حالیہ ہفتوں میں مختلف ہندوستانی ایئرلائنز میں تکنیکی خرابیوں کے متعدد واقعات سامنے آئے ہیں، اور یہ واقعہ بھی اسی سلسلے کی ایک کڑی ہے۔
