حیدرآباد: قانون ساز کونسل کی رکن K Kavithaنے بدھ کے روز بھارت راشٹرا سمیتی (بی آر ایس) پر سخت تنقید کی، محض چند گھنٹوں بعد جب پارٹی نے انہیں مبینہ طور پر پارٹی مخالف سرگرمیوں کی بنیاد پر معطل کر دیا۔ کویتا نے جوبلی ہلز میں واقع تلنگانہ جاگروتی ہیڈکوارٹر سے میڈیا سے خطاب کرتے ہوئے معطلی کا حکم نامہ پڑھ کر سنایا اور اسے ایک بڑی سازش کا حصہ قرار دیا۔
K Kavithaنے اپنی تقریر کا آغاز ’جئے تلنگانہ‘ اور ’جئے جاگروتی ‘ کے نعروں سے کیا اور کہا کہ انہوں نے تلنگانہ تحریک کے دوران اپنے والد کے چندر شیکھر راؤ کی انگلی تھام کر جدوجہد کا حوصلہ سیکھا۔ انہوں نے سوال اٹھایا کہ احتجاج کے دوران پارٹی کا کھنڈوا پہننا کیسے پارٹی مخالف سرگرمی قرار دیا جا سکتا ہے۔
کویتا نے کہا کہ وہ معطلی نوٹس کے دو اہم نکات کا جواب دینا چاہتی ہیں۔ تہاڑ جیل سے رہائی کے بعد سے وہ مختلف عوامی مسائل پر لڑائی لڑتی رہی ہیں، جن میں سرکاری اسکولوں میں فلاحی کوتاہیوں کے خلاف احتجاج، بناکاچرلا میں اراضی بے دخلی اور پنشن میں اضافے کی مہمات شامل ہیں۔ انہوں نے دعویٰ کیا کہ نومبر سے اب تک وہ 47 اسمبلی حلقوں میں خواتین کے مسائل اور عوامی شکایات کو اجاگر کرتی رہی ہیں۔
ہریش راؤ اور سنتوش راؤ پر سنگین الزامات
کویتا نے بی آر ایس قائدین ٹی ہریش راؤ اور بی سنتوش راؤ پر ان کے خلاف منظم کردار کشی کی مہم چلانے کا الزام عائد کیا۔ ان کا کہنا تھا کہ صرف اس لیے کہ ان کے گھروں میں سونا ہے، اس کا مطلب یہ نہیں کہ ہم نے سنہری تلنگانہ تعمیر کر لیا ہے۔
انہوں نے کہا کہ انہوں نے ورکنگ صدر کے ٹی راما راؤ کو اس سازش کی اطلاع دی تھی لیکن 103 دن گزرنے کے باوجود انہوں نے ان کی خیریت تک دریافت نہیں کی۔ کویتا نے سوال کیا کہ اگر ایک خاتون قانون ساز کونسل رکن مشکل حالات سے گزر رہی ہو اور اس کا اپنا بھائی خبر نہ لے تو یہ پارٹی قیادت کے بارے میں کیا ظاہر کرتا ہے؟
کویتا نے الزام لگایا کہ ذاتی مفاد رکھنے والے افراد نے انہیں پارٹی سے باہر نکلوایا ہے اور خبردار کیا کہ اسی طرح کی سازشیں مستقبل میں کے ٹی راما راؤ اور حتیٰ کہ کے چندر شیکھر راؤ کو بھی نشانہ بنا سکتی ہیں۔
