حیدرآباد: جرنلسٹس کوآپریٹیو ہاؤسنگ سوسائٹی کے دفتر میں مرحومہ خاتون صحافی [en]Swetcha Votarkar[/en] کو خراج عقیدت پیش کرنے کے لیے منگل کے روز تعزیتی اجلاس منعقد ہوا، جس کی صدارت سوسائٹی کے صدر بی گوپراجو نے کی۔
سوسائٹی کے ارکان نے سویچھا ووتارکر کو یاد کرتے ہوئے انہیں ایک فرض شناس اور پرعزم صحافی قرار دیا۔ وہ سوسائٹی کی مینجمنٹ کمیٹی کی بھی رکن تھیں۔
تلنگانہ میڈیا اکیڈمی کے سابق صدر الم نارائنا نے اجلاس سے خطاب کرتے ہوئے ان یوٹیوب چینلز اور سوشیل میڈیا پلیٹ فارمز پر شدید برہمی ظاہر کی جنہوں نے سویچھا کے انتقال کے بعد ان کی نجی زندگی پر غیر اخلاقی رپورٹس نشر کیں۔
انہوں نے کہا: “سوشیل میڈیا اور یوٹیوب چینلز نے سویچھا کو دوسری مرتبہ قتل کیا ہے”۔ انہوں نے بعض میڈیا اداروں پر اخلاقی حدود کی سنگین خلاف ورزی اور انسانی ہمدردی کو پسِ پشت ڈالنے کا الزام عائد کیا۔
الم نارائنا نے متنبہ کیا کہ اگر اس قسم کی رپورٹس کا سلسلہ جاری رہا تو اسے ہرگز برداشت نہیں کیا جائے گا اور اس کے خلاف اجتماعی سطح پر کارروائی کی جائے گی۔
اس موقع پر آندھرا جوتی کے سابق ایڈیٹر کے سرینواس، ٹی نیوز کے سی ای او و سابق سوسائٹی سکریٹری شیلش ریڈی، کملا کرآچاریہ، پربھاکر راؤ، مہیشور گوڑ، یوگانند، ماروتی ساگر، باسوا پنا ئیا، لکشمی نارائنا، اور بھاگیہ لکشمی نے بھی شرکت کی اور سویچھا کو خراج عقیدت پیش کیا۔
