حیدرآباد: تلنگانہ کے ڈپٹی چیف منسٹر و وزیر مالیات و توانائی ملوبھٹی وکرامارکا نے مدھیرہ حلقہ میں جاری [en]Indira Mahila Dairy[/en] پائلٹ پروجیکٹ کی عمل آوری میں تیزی لانے کی ہدایت دی ہے، اور 20 دن کے اندر مکمل سطح پر اسکیم کے آغاز کا نشانہ مقرر کیا ہے۔
اتوار کو مدھیرہ کیمپ آفس میں منعقدہ جائزہ اجلاس کے دوران ضلع کلکٹر انودیپ دوریشٹی اور ڈی آر ڈی او، زراعت، مویشی پالن اور فلاح و بہبود کے محکموں کے عہدیداروں کے ساتھ اسکیم کی پیش رفت کا جائزہ لیا گیا۔
ڈپٹی چیف منسٹر نے حکام کو ہدایت دی کہ اسکیم کے تحت ہر استفادہ کنندہ کو دو بھینسیں فراہم کی جائیں، اور ہر گھر میں کم از کم چار دودھ دینے والے جانوروں کی رہائش کے لیے مناسب شیڈ تعمیر کیے جائیں۔
انہوں نے شفافیت پر زور دیتے ہوئے کہا کہ مویشی خریداری کی ہر ٹیم میں ایک ویجیلنس افسر شامل ہونا ضروری ہے، اور کسی بھی قسم کی بے قاعدگی کو برداشت نہیں کیا جائے گا۔
چارے کی فراہمی سے متعلق بھٹی وکرامارکا نے کہا کہ اسکیم کے تحت بڑے پیمانے پر چارے کی ضرورت ہوگی، اور متعلقہ محکمہ جات کو ہدایت دی گئی کہ اس کام کو مقامی بے روزگار نوجوانوں کے لیے روزگار کے مواقع سے جوڑیں۔
جائزہ اجلاس میں ڈی آر ڈی او عہدیدار سنیاسیا، ایس سی کارپوریشن ای ڈی نوین بابو، ضلع اقلیتی فلاح و بہبود افسر پورندر، برقی محکمہ کے ایس ای سرینواس چاری، مدھیرہ زراعت اے ڈی وجے چندر اور دیگر عہدیدار شریک تھے۔
