حیدرآباد: تلنگانہ ہائی کورٹ نے پیر کے روز ریاستی کبڈی ایسوسی ایشن کو 2011 کے National Sports Codeپر عمل نہ کرنے پر نوٹس جاری کیں۔ یہ اقدام کبڈی کوچ سی. پون کمار یادو کی جانب سے دائر کی گئی عوامی مفاد کی عرضی کی سماعت کے دوران کیا گیا۔
چیف جسٹس اپریش کمار سنگھ اور جسٹس جی. ایم. محی الدین پر مشتمل بینچ نے کیس کی سماعت کی۔ عرضی گزار کے وکیل نے دلیل دی کہ ایسوسی ایشن میں جز وقتی ممبران اور ملازمین شامل ہیں جو ضابطے کے خلاف ہے۔ انہوں نے عدالت سے گزارش کی کہ حکومت کو مقابلوں اور تربیت کے لیے مالی امداد روکنے کے احکامات جاری کرے۔
اضافی ایڈوکیٹ جنرل عمران خان نے موقف اختیار کیا کہ اس معاملے میں حکومت کا کردار محدود ہے۔ عدالت نے دلائل سننے کے بعد ایسوسی ایشن کو نوٹس جاری کرتے ہوئے سماعت کو چار ہفتوں کے لیے ملتوی کردیا۔
