حیدرآباد ۔ شہر میں پہلی بار Tesla Car داخل ہوئی جب مقامی سرجن ڈاکٹر پربین کوڈورو نے ماڈل وائی خریدا۔ یہ گاڑی بھارت کی سڑکوں پر رجسٹرڈ ہونے والی چھٹی ٹیسلا ہے۔
ڈاکٹر کوڈورو، جو ’سری نندکا‘ فرٹیلیٹی اینڈ لیپروسکوپی سینٹر کوم پلی میں جدید لیپروسکوپک اور لیزر سرجن ہیں، نے یہ کار 27 ستمبر کو ممبئی سے وصول کی۔ انہوں نے یہ بکنگ اس وقت کی جب ٹیسلا نے ممبئی میں اپنا شو روم کھولا تھا۔
ایک اور خریدار نے بھی حیدرآباد سے ٹیسلا بک کی، لیکن سب سے پہلے ڈیلیوری ڈاکٹر کوڈورو کو ملی۔ وہ ممبئی سے سرخ ماڈل وائی خود ڈرائیو کرتے ہوئے 770 کلومیٹر کا سفر کر کے حیدرآباد پہنچے۔ اس دوران انہوں نے پونے اور سولاپور میں کار چارج کی۔
تلنگانہ میں گاڑیوں کے ٹیکس پر تنقید
ڈاکٹر کوڈورو نے تلنگانہ کی گاڑیوں کے ٹیکس قوانین پر شدید تنقید کی۔ ان کے مطابق ماڈل وائی کی قیمت 63 لاکھ روپئے تھی، لیکن انہیں مزید 22 فیصد ٹیکس ادا کرنا پڑا کیونکہ خریداری ریاست کے باہر ہوئی تھی۔ اگر گاڑی تلنگانہ میں رجسٹر ہوتی تو انہیں ٹیکس سے چھوٹ ملتی۔
اس بھاری اخراجات کے باوجود ڈاکٹر کوڈورو نے واہن پوجا کی رسم ادا کی۔ فوٹوز میں گاڑی کو ہاروں اور کُمکُم سے سجایا گیا جبکہ ناریل توڑ کر دعا کی گئی۔ انہوں نے آن لائن پوسٹ کیا کہ کسی بھی گاڑی کو، بشمول ٹیسلا، بھارت کی ثقافت میں پانچ ستارہ سیفٹی ریٹنگ تب ہی مل سکتی ہے جب واہن پوجا کی جائے۔
یہ تصاویر تیزی سے وائرل ہوئیں۔ کئی صارفین نے اس منظر کو روایت اور ٹیکنالوجی کے ملاپ کی علامت قرار دیا۔ ایک نے لکھا کہ بھارت میں واہن پوجا ہی اصل کریش ٹیسٹ سرٹیفکیشن ہے۔ ایک اور صارف نے طنزیہ کہا کہ نِمبو اور مرچی کے بغیر Tesla Car بھی محفوظ نہیں۔
