حیدرآباد: بھدرادری کوتہ گوڈم ضلع کے برگم پاڈو منڈل کے Cheruvu Singaramگاؤں میں سرکاری پرائمری اسکول خستہ حالی کا شکار ہو گیا ہے جس کے بعد طلبہ کو عمارت سے باہر نکال کر ایک عارضی جھونپڑی میں تعلیم دلائی جا رہی ہے۔ والدین نے متنبہ کیا ہے کہ 35 سال پرانی یہ عمارت طلبہ اور اساتذہ دونوں کے لیے سنگین خطرہ بن چکی ہے کیونکہ حال ہی میں چھت کا بڑا حصہ گر گیا۔
خوش قسمتی سے واقعہ اس وقت پیش آیا جب اسکول بند تھا، تاہم والدین کے مطابق عمارت برسوں سے غیر محفوظ تھی۔ چھت سے زنگ آلود سریا باہر نکل آیا ہے، بارش کا پانی اوپر جمع ہوتا ہے اور تاروں میں رساو کے باعث بچوں کو بجلی کے جھٹکے بھی لگے ہیں۔
والدین نے الزام عائد کیا کہ مقامی رکن اسمبلی پایم وینکٹیشورلو اور محکمہ تعلیم کے حکام سے بار بار شکایت کے باوجود کوئی ٹھوس اقدام نہیں کیا گیا، صرف وقتی مرمت کے ذریعے معاملہ ٹالا جاتا رہا۔ ایک والد بلارام نے کہا کہ جب بھی چھت سے سیمنٹ گرتی ہے معمولی مرمت کر دی جاتی ہے لیکن بنیادی مسئلہ وہیں رہتا ہے۔
اس اسکول میں تقریباً 35 طلبہ زیر تعلیم ہیں جنہیں اب نزدیکی آنگن واڑی مرکز کے شیڈ میں کلاسز کروائی جا رہی ہیں کیونکہ بچے ٹوٹی پھوٹی کلاس رومز میں داخل ہونے سے خوفزدہ ہیں۔ والدین نے حکومت سے فوری طور پر نئی عمارت کی منظوری دینے کا مطالبہ کیا ہے اور کہا کہ زیادہ تر طلبہ غریب گھرانوں سے تعلق رکھتے ہیں اور ان کے والدین پرائیویٹ اسکولوں کا خرچ برداشت کرنے کے قابل نہیں ہیں۔
About the Author
