حیدرآباد: کانگریس لیڈر اور سابق ڈپٹی چیف منسٹر کڈیم سری ہری نے الزام عائد کیا ہے کہ بی جے پی نے پسماندہ طبقات کو 42 فیصد BC Reservationفراہم کرنے کے قانون کی منظوری میں رکاوٹ ڈالی ہے، حالانکہ اسمبلی میں ان بلوں کی حمایت کی گئی تھی۔
انہوں نے کہا کہ مقامی اداروں، تعلیم اور ملازمت کے شعبوں میں بی سی طبقے کو 42 فیصد ریزرویشن فراہم کرنے کے لیے پیش کردہ بلوں کو اسمبلی میں بی جے پی اور بی آر ایس دونوں نے حمایت دی، لیکن جب ان بلوں کو مرکزی منظوری کے لیے پارلیمنٹ میں پیش کرنے کی بات آئی تو بی جے پی نے کوئی عملی قدم نہیں اٹھایا۔
کڈیم سری ہری نے مطالبہ کیا کہ ان بلوں کو آئین کی نویں شیڈول میں شامل کیا جائے تاکہ انہیں عدالتی چیلنجز سے تحفظ مل سکے۔ انہوں نے بی جے پی اور بی آر ایس پر الزام لگایا کہ وہ عوام کو گمراہ کرنے کے لیے جان بوجھ کر اصل مسئلے سے توجہ ہٹانے کی کوشش کر رہے ہیں۔
انہوں نے کہا کہ ریاستی حکومت نے ذات پات کی مردم شماری کی بنیاد پر یہ کوٹہ طے کیا ہے اور اسمبلی میں تمام پارٹیوں نے اس کی تائید کی۔ اب مرکز کی خاموشی کو دیکھتے ہوئے ریاستی حکومت نے دہلی کے جنتر منتر پر احتجاج کا فیصلہ کیا ہے۔
وزیراعلیٰ ریونت ریڈی، تلنگانہ کے ایم پیز، ایم ایل ایز اور دیگر عوامی نمائندے اس مظاہرے میں حصہ لیں گے تاکہ مرکز پر دباؤ ڈالا جا سکے کہ وہ ان بلوں کو قانونی تحفظ فراہم کرے۔
About the Author
