حیدرآباد: حیدرآباد کے ونستھلی پورم علاقے میں ایک پوسٹل ملازم نے Online Bettingکے باعث مالی بحران میں مبتلا ہو کر خودکشی کر لی۔ پولیس کے مطابق متوفی کی شناخت نریش کے طور پر ہوئی ہے، جو آندھرا پردیش کے ضلع وجیانگرم کے بوبّلی کا رہنے والا تھا۔
نریش اپنی اہلیہ کیرتی اور بیٹی بھاویا کے ساتھ حیدرآباد میں مقیم تھا اور محکمہ ڈاک میں ملازم تھا۔ پولیس نے بتایا کہ نریش کو کافی عرصے سے آن لائن سٹہ بازی کی لت لگ چکی تھی، جس نے اسے شدید مالی مشکلات میں مبتلا کر دیا تھا۔
خودکشی نوٹ میں 15 لاکھ کے قرض اور سٹہ بازی کا اعتراف
تحقیقات کے دوران پولیس کو ایک خودکشی نوٹ ملا ہے، جس میں نریش نے اعتراف کیا کہ وہ آن لائن بیٹنگ ترک کرنے میں ناکام رہا اور اس وجہ سے اس پر تقریباً 15 لاکھ روپئے کا قرض چڑھ گیا۔ قرض کی واپسی میں ناکامی اور ذہنی دباؤ کے باعث اس نے یہ انتہائی قدم اٹھایا۔
بتایا گیا ہے کہ نریش گزشتہ چند دنوں سے بیمار تھا اور گھر میں ہی مقیم تھا۔ واقعہ کے وقت اس کے اہلِ خانہ گھر پر موجود نہیں تھے، جس کا اس نے فائدہ اٹھاتے ہوئے اپنی جان لے لی۔
پولیس نے مقدمہ درج کر کے تحقیقات شروع کر دی ہیں۔
