حیدرآباد: ریاستی وزیر انفارمیشن ٹیکنالوجی و صنعت، دودڈیلا Sridhar Babuنے کہا ہے کہ کانگریس حکومت مقامی بلدیاتی اداروں میں 42 فیصد بی سی تحفظات کے نفاذ کے لیے مکمل طور پر پُرعزم ہے، لیکن مرکز کی بی جے پی حکومت اور گورنر کی جانب سے اہم قانونی منظوریوں میں تاخیر کی جا رہی ہے۔
تاڈی چیرلا میں میڈیا سے بات کرتے ہوئے سری دھر بابو نے کہا کہ کانگریس نے راہول گاندھی کی “کاما ریڈی ڈیکلریشن” کی بنیاد پر اسمبلی میں بی سی تحفظات کا بل منظور کیا اور اسے منظوری کے لیے صدر جمہوریہ کو بھیج دیا، لیکن تاحال منظوری نہیں ملی۔ کابینہ سے منظور شدہ آرڈیننس بھی گورنر کی منظوری کا منتظر ہے۔
انہوں نے بی جے پی پر شدید تنقید کرتے ہوئے کہا کہ مرکز بی سی طبقات کے حقوق کے بارے میں سنجیدہ نہیں ہے۔ سری دھر بابو نے بی جے پی ارکان پارلیمان اور ارکان اسمبلی کو چیلنج کیا کہ وہ بی سی تحفظات کو نویں شیڈول میں شامل کرانے کے لیے آواز بلند کریں۔ انہوں نے کہا کہ اگر بی جے پی واقعی بی سی طبقات سے مخلص ہے تو وہ کانگریس کے ساتھ اس مطالبے میں شامل ہو۔
وزیر موصوف نے اعلان کیا کہ اس تاخیر کے خلاف بطور احتجاج 5، 6 اور 7 اگست کو دہلی کے جنتر منتر پر دھرنا دیا جائے گا، جس کی قیادت وزیر اعلیٰ ریونت ریڈی کریں گے۔
انہوں نے بی آر ایس پر بھی تنقید کی اور کہا کہ جس پارٹی نے 10 سال تک اقتدار میں رہ کر بی سی تحفظات کا کوئی قانون منظور نہیں کیا، وہ آج سیاسی فائدے کے لیے مگرمچھ کے آنسو بہا رہی ہے۔ سری دھر بابو نے بی آر ایس قائدین کو دہلی کے احتجاج میں شامل ہونے کی دعوت دیتے ہوئے کہا کہ وہ اگر مخلص ہیں تو میدان میں آئیں۔
علاوہ ازیں، سری دھر بابو نے تاڈی چیرلا کے دندو رمیش کو این آر ای جی ایس ریاستی کونسل میں تقرری پر مبارکباد پیش کی اور اسے دلت قیادت کی عزت افزائی قرار دیا۔
