حیدرآباد: سابق وزیر تلنگانہ ہریش راؤ نے ریاست بھر میں منعقد کیے جا رہے [en]Rythu Bharosa[/en] وجے اتسَو تقاریب پر سخت تنقید کی ہے اور کہا ہے کہ یہ سب آنے والے مقامی بلدیاتی انتخابات سے قبل رائے دہندوں کو گمراہ کرنے کی کوشش ہے۔
سوشیل میڈیا پلیٹ فارم ‘ایکس’ پر اپنے بیان میں ہریش راؤ نے الزام لگایا کہ کانگریس حکومت ان تقریبات کے ذریعہ رعیتو بھروسہ اسکیم کو کامیاب ظاہر کرنے کی کوشش کر رہی ہے، جب کہ گزشتہ 19 مہینوں سے کسانوں کو نظر انداز کیا گیا ہے۔
انہوں نے کہا کہ انتخابی منشور میں کانگریس نے فی ایکر 15,000 روپئے دینے کا وعدہ کیا تھا، مگر اب صرف 12,000 روپئے دیے جا رہے ہیں، جو کسانوں کے ساتھ کھلا دھوکہ ہے۔
ہریش راؤ کا کہنا تھا کہ خریف اور ربی دونوں سیزن کے لیے کسانوں کو ادائیگیاں نہیں کی گئیں اور اب حکومت انہی حالات میں جشن منانے کی تیاری کر رہی ہے۔ انہوں نے سوال کیا کہ آیا یہ تقاریب دو فصلوں کی عدم ادائیگی، کسانوں کے اعتماد کے ٹوٹنے اور قرض معافی کی ناکامی کا جشن ہیں؟
انہوں نے کہا کہ برسراقتدار جماعت نے کسان برادری کے ساتھ دھوکہ کیا ہے اور یہ عوامی تقاریب ان کی مشکلات کا مذاق اڑانے کے مترادف ہیں۔
