حیدرآباد: تلنگانہ کے ضلع رنگاریڈی کے تیرپال گاؤں میں ایک 33 سالہ شخص نے بیوی کی علیحدگی سے دل برداشتہ ہو کر 13 جولائی کی شب اپنے گھر میں پھانسی Rangareddy Suicide لگا کر خودکشی کر لی۔
پولیس کے مطابق متوفی کی شناخت پرساد کے طور پر ہوئی ہے، جس کی نو سال قبل اسی گاؤں کی رہائشی پروالیکا سے شادی ہوئی تھی۔ اس جوڑے کے تین بچے ہیں، جن میں دو بیٹیاں اور ایک بیٹا شامل ہیں۔ ابتدائی برسوں میں ازدواجی زندگی خوشگوار رہی، لیکن چار ماہ قبل گھریلو تنازعات کی وجہ سے پروالیکا اپنے بچوں کے ساتھ میکے چلی گئی اور واپس نہیں آئی۔
پرساد مسلسل تنہائی اور ذہنی دباؤ کا شکار تھا۔ اہلِ خانہ کے مطابق وہ بیوی اور بچوں کی جدائی کو برداشت نہیں کر پا رہا تھا۔ بالآخر 13 جولائی کو رات تقریباً 9:15 بجے اس نے ساڑی کے ذریعے پنکھے سے لٹک کر اپنی جان لے لی۔ خودکشی کے وقت وہ گھر میں تنہا تھا۔
واقعہ کی اطلاع ملتے ہی کونڈاپور پولیس نے موقع پر پہنچ کر لاش کو تحویل میں لیا اور پوسٹ مارٹم کے لیے روانہ کیا۔ پرساد کی والدہ سوروپا کی جانب سے دی گئی شکایت پر پولیس نے مقدمہ درج کر کے تحقیقات کا آغاز کر دیا ہے۔
پولیس نے بتایا کہ رنگاریڈی خودکشی کیس میں مزید تفصیلات جمع کی جا رہی ہیں اور اہل خانہ کے بیانات قلمبند کیے جا رہے ہیں۔
