حیدرآباد: اڑیسہ سے تعلق رکھنے والے تین مہاجر مزدور اُس وقت ہلاک ہو گئے جب میڈچل–ملکاجگیری ضلع کے کیسرا میں آوٹر رنگ روڈ پر ایک ٹرالی آٹو نے انہیں ٹکر مار دی۔ پولیس کے مطابق ہلاک شدگان میں 28 سالہ نارائن، 24 سالہ چیک موہن اور 32 سالہ جے رام شامل ہیں، جو محض دو دن قبل شاہ میر پیٹ روزگار کی تلاش میں پہنچے تھے۔ وہ سڑک کنارے پودوں کے قریب گھاس صاف کرنے کا کام کر رہے تھے۔
صبح کا کام ختم کرنے کے بعد Odisha labourersنے دوپہر کا کھانا کھایا اور سڑک کنارے آرام کر رہے تھے کہ حادثہ پیش آیا۔ سیل ٹاور کا سامان لے جانے والا ٹرالی آٹو، جو وشاکھاپٹنم کے گاجو واکا سے میڈچل جا رہا تھا، ڈرائیور کے قابو کھونے پر پہلے سڑک کنارے ریلنگ سے ٹکرایا اور پھر مزدوروں پر چڑھ گیا۔
حادثے میں تین مزدور موقع پر ہی دم توڑ گئے جبکہ چند دیگر مزدور بچ نکلنے میں کامیاب ہوئے۔ پولیس نے ابتدائی تحقیقات میں پایا کہ ڈرائیور گنیش نیند کی حالت میں گاڑی چلا رہا تھا۔ اسے حراست میں لے لیا گیا ہے اور مقدمہ درج کر لیا گیا ہے۔ کیسرا کے سرکل انسپکٹر انجنیلو نے بتایا کہ مزید تحقیقات جاری ہیں۔
