حیدرآباد: ضلع عادل آباد کے بوتھ حلقہ کے پیپل دھری گاؤں میں اتوار کے روز ایک رہائشی مکان میں Gas Leak Fireسے ایک ہی خاندان کے 6 افراد شدید طور پر جھلس گئے۔
یہ واقعہ اس وقت پیش آیا جب مبینہ طور پر پکوان گیس سلنڈر سے گیس خارج ہوئی اور اچانک آگ بھڑک اٹھی۔ مقامی لوگوں کے مطابق آگ تودسام سونے راؤ کے گھر میں لگی جہاں اس وقت تمام 6 افراد موجود تھے۔ آگ نے پورے گھر کو اپنی لپیٹ میں لے لیا اور سبھی شدید جھلس گئے۔
سابق سرپنچ بنڈاری سریدھر ریڈی نے مقامی افراد کے ساتھ فوری طور پر تمام زخمیوں کو بوتھ سرکاری اسپتال منتقل کیا۔ ابتدائی طبی امداد کے بعد تمام زخمیوں کو 108 ایمبولنس کے ذریعہ عادل آباد کے ریمس اسپتال منتقل کیا گیا، جہاں ڈاکٹروں نے 3 افراد کی حالت کو نازک قرار دیا ہے۔
واقعہ کی اطلاع ملنے پر سب انسپکٹر سری سائی بوتھ اسپتال پہنچے اور متاثرہ خاندان اور مقامی افراد سے تفصیلات حاصل کیں۔
متعلقہ حکام نے آگ کی وجوہات کی مکمل تحقیقات کا آغاز کر دیا ہے، جبکہ متاثرہ خاندان کو فوری طبی امداد اور ضروری سہولیات فراہم کی جا رہی ہیں۔
