حیدرآباد: سنگاریڈی ضلع پولیس نے جرائم کی تفتیش اور نگرانی کو مزید مؤثر بنانے کے لئے ٹاؤن پولیس اسٹیشن میں Iris scanٹیکنالوجی کا آغاز کیا ہے۔ عہدیداروں نے بتایا کہ اس نظام کے ذریعے گشت کے دوران مشتبہ افراد کی فوری شناخت ممکن ہوگی اور تحقیقات میں تیزی آئے گی۔
اب تک پولیس زیادہ تر مشتبہ افراد کی شناخت کے لئے فنگر پرنٹ اسکین پر انحصار کر رہی تھی، لیکن اس نئی سہولت کے تحت اب اہلکار کسی شخص کی آنکھ کا اسکین لے کر یہ معلوم کرسکتے ہیں کہ آیا اس کا کوئی سابقہ مجرمانہ ریکارڈ ہے یا اس نے ماضی میں کہاں جرائم کیے ہیں۔ حکام نے کہا کہ یہ نظام ان خامیوں کو بھی دور کرے گا جنہیں عادی مجرم پولیس کی نظروں سے بچنے کے لئے استعمال کرتے تھے۔
پولیس کے مطابق آئرس اسکین ڈیوائس چند سیکنڈز میں نتیجہ فراہم کرتا ہے جس سے شبینہ گشت کے دوران مشتبہ افراد کی فوری تصدیق ممکن ہوجاتی ہے۔ اگر کسی کا ریکارڈ موجود ہو تو اس کا مکمل پروفائل، بشمول زیر التوا وارنٹ یا مختلف مقامات پر جرائم کی تفصیل، فوراً اہلکاروں کے سامنے آجاتی ہے۔
سنگاریڈی ڈپٹی سپرنٹنڈنٹ آف پولیس ستیہ گوڑ نے خود ٹاؤن پولیس اسٹیشن میں نئی سہولت کا معائنہ کیا۔ انہوں نے کہا کہ یہ نظام موجودہ فنگر پرنٹ جانچ کے ساتھ ساتھ استعمال ہوگا جس سے پولیس کو دوہری بایومیٹرک تصدیق کی سہولت حاصل ہوگی۔
ڈی ایس پی نے کہا کہ شبینہ گشت کے دوران ہمارے اہلکار اب مشتبہ افراد کی فوری شناخت فنگر پرنٹ اور آئرس اسکین دونوں کے ذریعے کرسکتے ہیں۔ انہوں نے زور دیا کہ یہ ٹیکنالوجی مجرموں کو پولیس کو گمراہ کرنے یا جرم کے بعد بچ نکلنے سے روکنے میں مددگار ہوگی۔
مقامی عوام اور برادری کے رہنماؤں نے اس اقدام کا خیرمقدم کیا۔ ان کا کہنا تھا کہ پولیس کی جانب سے جدید ٹیکنالوجی کا استعمال نہ صرف جرائم کو کم کرے گا بلکہ عوام کا اعتماد بھی بڑھائے گا۔ حکام نے بتایا کہ اس سہولت کو بتدریج ضلع کے دیگر پولیس اسٹیشنوں تک بھی توسیع دی جاسکتی ہے۔
About the Author
