حیدرآباد: تلنگانہ میں فون ٹیپنگ معاملے کی جانچ میں تیزی آ گئی ہے اور خصوصی تحقیقاتی ٹیم نے بھارت راشٹرا سمیتی کے کارگزار صدر کے ٹی راما راؤ کو پوچھ گچھ کے لیے طلب کیا ہے۔ ایس آئی ٹی کی جانب سے جاری نوٹس میں انہیں جمعہ کے روز صبح 11 بجے جوبلی ہلز میں واقع اسسٹنٹ کمشنر آف پولیس کے دفتر میں حاضر ہونے کی ہدایت دی گئی ہے۔ یہ پیش رفت ریاستی سیاست میں نئی ہلچل کا سبب بن گئی ہے۔
نوٹس فوجداری ضابطۂ کار کی دفعہ 160 کے تحت نندنی نگر میں واقع کے ٹی راما راؤ کی رہائش گاہ پر دیا گیا۔ حکام کے مطابق یہ کارروائی 2023 کے تلنگانہ اسمبلی انتخابات کے دوران اپوزیشن رہنماؤں کے مبینہ طور پر فون ٹیپ کیے جانے کی تحقیقات کا حصہ ہے، جس نے قومی سطح پر بھی توجہ حاصل کی ہے۔
جانچ کا دائرہ وسیع | Phone Tapping KTR
اس معاملے میں پہلے ہی کئی سینئر پولیس افسران کو گرفتار کیا جا چکا ہے۔ ایس آئی ٹی نے حال ہی میں سابق وزیر ٹی ہریش راؤ سے بھی طویل پوچھ گچھ کی تھی، جس کے دوران اہم معلومات حاصل ہونے کا دعویٰ کیا جا رہا ہے۔ اب کے ٹی راما راؤ کو طلب کیے جانے سے یہ تاثر مضبوط ہو گیا ہے کہ جانچ کا دائرہ مزید وسیع کیا جا رہا ہے۔
سیاسی مبصرین کا کہنا ہے کہ اس پیش رفت کے بعد تلنگانہ کی سیاست میں کشیدگی بڑھنے کے امکانات ہیں، کیونکہ معاملہ براہِ راست اعلیٰ سطحی سیاسی قیادت تک پہنچ چکا ہے۔ حکمراں اور اپوزیشن جماعتوں کے درمیان بیانات کا تبادلہ بھی تیز ہو گیا ہے۔
سیاسی ردعمل اور الزامات | Phone Tapping KTR
ایس آئی ٹی کے اقدام پر ردعمل ظاہر کرتے ہوئے ٹی ہریش راؤ نے کانگریس زیر قیادت حکومت کو تنقید کا نشانہ بنایا۔ انہوں نے الزام عائد کیا کہ حکومت اس جانچ کو عوامی توجہ ہٹانے کے لیے استعمال کر رہی ہے۔ ان کا کہنا تھا کہ ایک دن انہیں اور اگلے دن کے ٹی راما راؤ کو نوٹس جاری کرنا محض سیاسی حربہ ہے۔
انہوں نے یہ بھی کہا کہ حکومت مبینہ کوئلہ گھوٹالے پر بات کرنے سے گریز کر رہی ہے۔ ان کے مطابق وزیر اعلیٰ ریونت ریڈی کی جانب سے جتنے بھی نوٹس جاری کیے جائیں، بھارت راشٹرا سمیتی چھ ضمانتوں اور 420 وعدوں پر عمل درآمد تک اپنی جدوجہد جاری رکھے گی۔ ہریش راؤ نے واضح کیا کہ وزیر اعلیٰ کو جوابدہ ٹھہرایا جاتا رہے گا۔
About the Author
