حیدرآباد: انڈین میڈیکل ایسوسی ایشن (آئی ایم اے) نے GST Council کے اس فیصلے کا خیرمقدم کیا ہے جس کے تحت کینسر سمیت کئی جان بچانے والی ادویات پر ٹیکس میں کمی کی گئی ہے۔ ایسوسی ایشن نے اپنے بیان میں کہا کہ یہ ایک قابل ستائش اقدام ہے جو ملک بھر میں لاکھوں مریضوں کے علاج کو مزید سستا بنائے گا۔
آئی ایم اے نے کہا کہ یہ فیصلہ عوامی صحت کو مستحکم کرنے اور سنگین بیماریوں سے لڑنے والے مریضوں کی مدد کرنے کے لیے حکومت کے عزم کو ظاہر کرتا ہے۔
مرکزی حکومت نے ٹیکس اصلاحات کے حصے کے طور پر کئی اہم اور جان بچانے والی ادویات پر جی ایس ٹی کم کرنے کا فیصلہ کیا ہے۔ کینسر اور دیگر امراض کی ادویات پر ٹیکس 12 فیصد سے گھٹا کر 5 فیصد کیا گیا ہے جبکہ کچھ ادویات پر اسے صفر تک لانے کی تجویز بھی زیر غور ہے۔ اس اقدام کا مقصد مہنگے علاج کی وجہ سے مریضوں اور ان کے اہل خانہ پر پڑنے والے مالی بوجھ کو کم کرنا ہے۔ حکومت نایاب امراض کے علاج میں استعمال ہونے والی ادویات کو مکمل طور پر جی ایس ٹی سے مستثنیٰ کرنے پر بھی غور کر رہی ہے۔
اگرچہ اس فیصلے کو مثبت قرار دیا گیا ہے، تاہم آئی ایم اے نے مزید اقدامات کی اپیل کی ہے تاکہ علاج معالجے کے اخراجات مزید کم ہوں۔ ایسوسی ایشن نے کیموتھراپی اور امیونوتھراپی کے علاوہ ذیابیطس، بلڈ پریشر، قلبی امراض، گردوں کے امراض اور دمہ کی ادویات پر مکمل طور پر جی ایس ٹی چھوٹ دینے کا مطالبہ کیا ہے۔
مزید برآں، آئی ایم اے نے طبی آلات پر جی ایس ٹی میں کمی کی سفارش کی تاکہ اسپتالوں اور کلینکس کے آپریشنل اخراجات گھٹ سکیں اور علاج مزید سستا ہو۔ اسی کے ساتھ اسپتال کے بستروں پر جی ایس ٹی ختم کرنے اور ہیلتھ انشورنس پریمیم کو بھی ٹیکس سے مستثنیٰ کرنے کی اپیل کی گئی تاکہ خاندانوں پر بوجھ کم ہو اور زیادہ لوگ بیمہ کے دائرے میں آسکیں۔
