Hyderabad: Jagitial mein SC Hostel ke paas Thursday ko ek afsosnak waqia samne aaya jab ek transformer explosion hua, jiske natije mein 8th class ka student shadeed tor par jhulsa gaya.
Zakhmi student ki shanakht Himesh Chandra ke tor par hui hai jo hostel mein muqeem tha. Police ke mutabiq, Himesh apni hostel building ke paas laktay kapray lene gaya tha ke us waqt paas mein laga transformer zor daar dhamakay se phat gaya. Dhamakay ke baad sholay seedha us par giray, jiske natije mein wo shadeed jhulsa.
Hostel staff ne foran radd-e-amal dikhate hue use Jagitial Area Hospital pohanchaya jahan se initial treatment ke baad behtar ilaj ke liye Karimnagar Hospital refer kar diya gaya.
Hospital zarae ka kehna hai ke Himesh ki halat intahai tashweeshnak hai aur usay special care mein rakha gaya hai.
Is waqia ke baad hostel ke dusray students mein khauf o hiras phail gaya hai. Unhon ne bijli ke puranay infrastructure par afsos ka izhar kiya aur future mein aise haadisat se bachne ke liye sakh aur foran iqdamat kiye jayein.
Maqami officials ne waqia ki jagah ka jaiza liya hai aur explosion ki wajah maloom karne ke liye tahqiqat ka aghaz kar diya gaya hai.
