حیدرآباد: کانگریس پارٹی نے پیر کے روز ’چلو دہلی‘ مہم کا آغاز کیا، جس کا مقصد تلنگانہ اسمبلی سے منظور شدہ BC reservationsبل کے لیے صدارتی منظوری حاصل کرنا ہے۔ پارٹی قائدین چَرلا پلی ریلوے اسٹیشن سے خصوصی ٹرین کے ذریعے روانہ ہوئے، جن کے ہمراہ ریاست کے تمام اضلاع سے نمائندے شریک ہوئے۔
آل انڈیا کانگریس کمیٹی کی تلنگانہ انچارج میناکشی نٹراجن، ٹی پی سی سی صدر مہیش کمار گوڑ، وزراء پونم پربھاکر اور واکیٹی سری ہری نے ٹرین کو روانہ کیا۔ بڑی تعداد میں کانگریس کارکنان بھی دہلی کے لیے روانہ ہوئے، جہاں 6 اگست کو جنتر منتر پر دھرنے کا منصوبہ ہے۔
پارٹی نے مرکزی حکومت پر الزام عائد کیا کہ وہ بی سی طبقات کو 42 فیصد تحفظات فراہم کرنے والے بل کو منظوری دینے میں تاخیر کر رہی ہے۔ کانگریس ایم پیز منگل کو پارلیمنٹ میں تحریک التواء پیش کر کے اس مسئلے پر بحث کا مطالبہ کریں گے۔
7 اگست کو پارٹی قائدین صدر جمہوریہ سے ملاقات کر کے ایک باضابطہ یادداشت پیش کریں گے۔ اجتماع سے خطاب کرتے ہوئے میناکشی نٹراجن نے کہا کہ اگرچہ تلنگانہ حکومت نے ریزرویشن کی منظوری دے دی ہے، مرکز اب بھی ٹال مٹول سے کام لے رہا ہے۔
انہوں نے کہا: “ہم اس جدوجہد کو اُس وقت تک جاری رکھیں گے جب تک بی سی تحفظات مکمل طور پر نافذ نہیں کیے جاتے۔”
