حیدرآباد ۔ تیلگو فلم انڈسٹری میں بڑھتی ہوئی فلم پائریسی کے خلاف جاری کارروائی اس وقت سنسنی خیز رخ اختیار کر گئی جب بدنام زمانہ ویب سائٹ I Bomma نے حیدرآباد سائبر کرائم پولیس کو براہِ راست دھمکی دی۔ یہ دھمکی پانچ افراد کی گرفتاری کے چند دن بعد سامنے آئی جو فلم پائریسی ریکیٹ میں ملوث پائے گئے تھے۔
تلگو فلم چیمبر آف کامرس کی شکایت پر حیدرآباد پولیس نے 65 سے زائد ویب سائٹس کی تحقیقات شروع کی ہیں جن پر فلموں کے غیر قانونی اجرا کا الزام ہے۔ فلم پروڈیوسروں نے یہ بھی کہا کہ ان ویب سائٹس کے آپریٹرز نے کھلے عام کاپی رائٹ کی حفاظت کرنے والوں کو دھمکیاں دی ہیں۔
پولیس کمشنر سی وی آنند کے مطابق صرف 2024 کے دوران انڈسٹری کو تقریباً 3,700 کروڑ روپئے کا نقصان ہوا۔ ان کا کہنا تھا کہ ملزمین بنیادی طور پر دو طریقے استعمال کرتے ہیں: سنیما ہال میں کیم کارڈنگ اور ڈیجیٹل ڈسٹری بیوشن سرورز کو ہیک کرکے ایچ ڈی پرنٹس چرانا۔
مزید برآں تحقیقات میں انکشاف ہوا کہ یہ پائریسی نیٹ ورکس آن لائن گیمنگ اور بیٹنگ ایپس کے اشتہارات کے ذریعے کروڑوں کماتے ہیں اور تمام لین دین کرپٹو کرنسی کے ذریعہ انجام دیے جاتے ہیں۔
پولیس کا سخت انتباہ
میڈیا سے گفتگو کرتے ہوئے سی وی آنند نے کہا کہ آئی بومّا اور دیگر پائریسی نیٹ ورکس کے خلاف سخت قانونی کارروائی کی جائے گی۔ انہوں نے کہا کہ چاہے ڈومینز کو کلاؤڈ فلیئر جیسی سروسز کے ذریعے چھپایا جائے، پولیس ان کے آپریٹرز کو ٹریس کرسکتی ہے۔ مزید برآں انڈین سائبر کرائم کوآرڈینیشن سنٹر کے تعاون سے ان کا بیک اینڈ ڈھانچہ ختم کیا جائے گا۔
تاہم آئی بومّا نے ایک کھلا خط جاری کرتے ہوئے پولیس کو متنبہ کیا کہ وہ ان پر توجہ نہ دیں ورنہ انہیں بھی توجہ دینا پڑے گی۔ خط میں کہا گیا کہ اگر آپ ہم پر توجہ مرکوز کریں گے تو ہمیں بھی مجبوراً آپ پر توجہ مرکوز کرنی ہوگی۔
پولیس نے فی الحال I Bomma کی اس دھمکی کا باضابطہ جواب نہیں دیا، لیکن حکام نے اشارہ دیا ہے کہ مزید کارروائی جاری ہے۔
