حیدرآباد: چیف منسٹر ریونت ریڈی نے کالیشورم لفٹ ایریگیشن پروجیکٹ پر جسٹس پی چندر گھوش کمیشن کی Kaleshwaram Reportکا جائزہ لینے کے لیے ہنگامی اجلاس طلب کیا ہے۔
یہ اجلاس اُس وقت طلب کیا گیا جب جمعرات کی صبح محکمہ آبپاشی کے اسپیشل چیف سکریٹری راہول بوجا کو 650 صفحات پر مشتمل مہر بند رپورٹ پیش کی گئی، جس کے بعد اسے وزیر اعلیٰ کے دفتر منتقل کر دیا گیا۔
یہ انکوائری کمیشن 14 مارچ 2024 کو قائم کیا گیا تھا اور اس نے پندرہ ماہ تک میڈی گڈہ، اننارم اور سندیلا بیراجز کے تکنیکی و مالیاتی پہلوؤں کا گہرائی سے جائزہ لیا۔ کمیشن نے 119 افراد کے بیانات قلمبند کیے۔
جمعرات کی شام منعقد ہونے والے جائزہ اجلاس میں وزیر آبپاشی کیپٹن این اُتم کمار ریڈی، چیف سکریٹری شانتی کماری، پرنسپل سکریٹری راہول بوجا اور کمیشن کے صدر جسٹس پی چندر گھوش شرکت کریں گے۔
ذرائع کے مطابق سینئر افسران رپورٹ کے نکات پر ابتدائی مشاورت شروع کر چکے ہیں، اور حکومت کی آئندہ کارروائیوں کا انحصار اسی رپورٹ کی سفارشات پر ہوگا۔
