حیدرآباد: تلنگانہ کے وزیر آبپاشی کیپٹن این اُتم کمار ریڈی نے منگل کے روز واضح کیا کہ ریاست کی [en]Telangana Water Rights[/en] پر کسی بھی قسم کا سمجھوتہ نہیں کیا جائے گا، چاہے وہ گوداوری ہو یا کرشنا ندی۔ انہوں نے سابق بی آر ایس حکومت پر الزام عائد کیا کہ اس نے آندھرا پردیش کے منصوبہ بند پولاورم-بناکا چرلا لنک پراجکٹ جیسے اہم پروجکٹس کو روکنے میں ناکامی کے ذریعہ تلنگانہ کے پانی کو گروی رکھ دیا۔
ڈاکٹر جیوتی راو پھولے پراجا بھون میں ایک تفصیلی پاور پوائنٹ پیش کرتے ہوئے اُتم کمار ریڈی نے بتایا کہ آندھرا پردیش نے 2018 اور 2019 میں کئی جی اوز جاری کرتے ہوئے گوداوری کے سیلابی پانی کو کرشنا اور پینار طاس کی طرف منتقل کرنے کے اقدامات کیے، جو مجموعی طور پر 300 ٹی ایم سی پانی کے انحراف پر مبنی ہیں، اور یہ 1980 کے گوداوری ٹریبونل ایوارڈ کی کھلی خلاف ورزی ہے۔
انہوں نے بتایا کہ آندھرا پردیش نے WAPCOS کو ہائر کر کے پہلے مرحلہ کے کاموں کی منظوری دی اور 6,000 کروڑ سے زائد کے ٹینڈرز جاری کیے۔ پراجکٹ کو رائلسیما کے لیے خشک سالی سے بچاؤ کے منصوبوں میں شامل کر کے اس کا دائرہ کار بڑھایا گیا تاکہ پانی کو ناگرجنا ساگر رائٹ کینال کے ذریعہ پینار طاس میں منتقل کیا جا سکے۔
اُتم کمار ریڈی نے کہا کہ سابق چیف منسٹر کے چندر شیکھر راؤ نے نہ صرف اس کی مخالفت نہیں کی بلکہ اپیکس کونسل اور بین الریاستی اجلاسوں میں بھی خاموشی اختیار کی، جس کا فائدہ اٹھا کر آندھرا پردیش نے ان پراجکٹوں کو “فَیٹ اکملی” کے طور پر پیش کیا۔
انہوں نے الزام لگایا کہ بی آر ایس قیادت نے آندھرا پردیش کو پہل کا موقع فراہم کیا، جس سے آئندہ پانی کی تقسیم میں تلنگانہ کو نقصان پہنچے گا۔ انہوں نے کہا کہ AP تنظیم نو قانون کی دفعات 84 اور 85 کے تحت تمام بین الریاستی پروجکٹوں کے لیے اپیکس کونسل کی منظوری ضروری ہے، لیکن کوئی مؤثر اعتراض درج نہیں کیا گیا۔
انہوں نے بتایا کہ کانگریس حکومت نے اقتدار میں آتے ہی قانونی اور انتظامی سطح پر کارروائیاں کیں۔ جل شکتی وزارت، گوداوری ریور مینجمنٹ بورڈ، اور پولاورم پراجکٹ اتھاریٹی کو اعتراضات کے خطوط روانہ کیے گئے، جن میں بتایا گیا کہ یہ منصوبہ بھدراچلم کے اطراف کے علاقوں کو زیر آب لا سکتا ہے اور مانوگورو ہیوی واٹر پلانٹ کو خطرے میں ڈال سکتا ہے۔
اُتم کمار ریڈی نے تکنیکی بنیادوں پر یہ بھی کہا کہ پولاورم سے بڑے پیمانے پر پانی کے انحراف کے لیے نئی ماحولیاتی منظوری ضروری ہے، کیونکہ 2005 کی اصل منظوری میں اس توسیع کا کوئی ذکر نہیں تھا۔ انہوں نے خوشی ظاہر کی کہ مسلسل اعتراضات کے بعد 30 جون کو یونین انوائرنمنٹ کی ای اے سی کمیٹی نے آندھرا پردیش کی تجویز کو ToR دیے بغیر ہی واپس کر دیا۔
کرشنا ندی کے سلسلہ میں انہوں نے بتایا کہ کانگریس حکومت نے 2015 میں کے سی آر کے ذریعہ دستخط کردہ 811 ٹی ایم سی میں سے صرف 299 ٹی ایم سی تلنگانہ کو الاٹ کرنے والے معاہدہ کو چیلنج کیا ہے، اور ریاست کے لیے 70 فیصد حصہ طلب کیا گیا ہے، جو کیچمنٹ ایریا، خشک سالی اور آبادی کی بنیاد پر ہے۔
انہوں نے زور دیا کہ سیتاراما پراجکٹ کی تکمیل اور گوداوری کے مکمل الاٹمنٹ کے استعمال کو حکومت کی اولین ترجیح بنائی گئی ہے۔ اگر آندھرا پردیش پولاورم-بناکا چرلا منصوبہ مکمل کرتا ہے، تو تلنگانہ نہ صرف اپنے پانی کے دعووں میں کمزور ہوگا بلکہ نئی آبپاشی اور پینے کے پانی کی اسکیمات بھی متاثر ہوں گی۔
اُتم کمار ریڈی نے کہا کہ کانگریس حکومت تلنگانہ کے پانی کے حقوق کے تحفظ کے لیے ہر قانونی، آئینی اور سیاسی راستہ اختیار کرے گی۔
