حیدرآباد :تلنگانہ کے سابق وزیر اور بی آر ایس رہنما ٹی۔ ہریش راؤ نے ایرہ گڈہ کا دورہ کیا جہاں انہوں نے آٹو ڈرائیوروں سے ملاقات کی اور ان کے مسائل سنے۔ انہوں نے خود بھی ایک آٹو رکشہ میں سوار ہوکر ایرہ گڈہ سے تلنگانہ بھون تک سفر کیا تاکہ ڈرائیور برادری کے ساتھ یکجہتی کا اظہار کرسکیں۔
ہریش راؤ نے کہا کہ کانگریس حکومت کے دور میں آٹو ڈرائیوروں کی حالت مزید خراب ہوگئی ہے۔ ان کے مطابق موجودہ حکومت کے دوران مالی مشکلات کے سبب 161 آٹو ڈرائیوروں نے خودکشی کرلی، جس سے ان کے خاندان اجڑ گئے۔
حکومت سے امداد اور وعدوں کی یاد دہانی | Harish Rao Protest
ہریش راؤ نے مطالبہ کیا کہ ہر متوفی ڈرائیور کے خاندان کو 10 لاکھ روپئے کا معاوضہ دیا جائے۔ انہوں نے آٹو ڈرائیوروں سے اپیل کی کہ وہ حوصلہ رکھیں اور خودکشی کا راستہ اختیار نہ کریں۔
انہوں نے بتایا کہ وہ رمیش گوڑ نامی آٹو ڈرائیور کے ساتھ سفر کر رہے تھے جس نے شکایت کی کہ وہ اپنے بچے کی فیس یا مکان کا کرایہ ادا کرنے کے قابل نہیں رہا۔ راؤ نے کہا، “حکومت سڑکوں پر 5,000 کروڑ خرچ کرتی ہے مگر آٹو ڈرائیوروں کے لیے فنڈ نہیں، یہ شرمناک ہے۔”
انہوں نے الزام لگایا کہ کانگریس حکومت نے آٹو ڈرائیوروں سے کیے گئے وعدے توڑ دیے ہیں اور وزیرِاعلیٰ ریونت ریڈی دہلی میں سیاسی سودوں میں مصروف ہیں، جبکہ مزدور طبقہ نظر انداز ہورہا ہے۔
راہل گاندھی پر وعدہ خلافی کا الزام | Harish Rao Protest
انہوں نے یاد دلایا کہ انتخابی مہم کے دوران راہول گاندھی نے ہر آٹو ڈرائیور کے لیے سالانہ 12,000 روپئے دینے کا وعدہ کیا تھا، مگر وہ وعدہ وفا نہیں ہوا۔ راؤ کے مطابق حکومت پر آٹو ڈرائیوروں کے 1,500 کروڑ روپئے واجب الادا ہیں۔
انہوں نے آندھرا پردیش کے وزیرِاعلیٰ چندرا بابو نائیڈو کی مثال دیتے ہوئے کہا کہ نائیڈو نے اقتدار میں واپسی کے ایک سال کے اندر ہر ڈرائیور کو 15,000 روپئے ادا کیے۔ انہوں نے کہا “ریونت ریڈی دو سال سے حکومت میں ہیں مگر ایک وعدہ بھی پورا نہیں کیا،” ۔
ہریش راؤ نے اعلان کیا کہ بی آر ایس اپنی تحریک جاری رکھے گی جب تک حکومت اپنے وعدے پورے نہیں کرتی۔ انہوں نے جوبلی ہلز کے ضمنی انتخاب میں کانگریس کو شکست دینے کی اپیل کرتے ہوئے کہا کہ یہی شکست وزیرِاعلیٰ کو عوامی مسائل پر توجہ دینے پر مجبور کرے گی۔
