حیدرآباد: سکندرآباد ریلوے پولیس اور ایگل ٹیموں نے مشترکہ کارروائی میں 4 گانجہ کوریئرز کو گرفتار کر کے 91 کلو گانجہ ضبط کیا جس کی مالیت تقریباً 22 لاکھ روپئے بتائی گئی۔ ملزمین ٹرین کے اے سی ڈبوں میں نئے ٹرالی بیگس کے ذریعہ منشیات منتقل کر رہے تھے تاکہ شک نہ ہو۔
Secunderabad Ganja ضبطی پر تفصیل دیتے ہوئے ایگل ڈائریکٹر سندیپ شندلیہ نے بتایا کہ گرفتار شدہ افراد کی شناخت پرکاش چندر پردھان، بسنت، گھنشیا م اور چترسینا کے طور پر کی گئی جو سب اوڈیشہ کے رہنے والے ہیں۔ یہ لوگ اسمگلر پرشانت کے لیے کوریئر کا کام کرتے تھے۔ ہر کوریئر کو 10 سے 15 کلو گانجہ دیا جاتا جسے وہ ٹرالی بیگ اور ہینڈ بیگ میں چھپا کر اے سی ٹکٹ پر سفر کرتے۔ ہر کامیاب ترسیل پر انہیں 10 ہزار روپئے معاوضہ ملتا تھا۔
پولیس نے بتایا کہ یہ گروہ گزشتہ ایک سال میں 20 مرتبہ اسی طریقے سے گانجہ کی ترسیل کر چکا ہے اور پونے میں سائی رام اور مامی نامی دو وصول کنندگان کو یہ مال سپلائی کرتا تھا۔ بار بار اے سی کوچز میں سفر اور ہر مرتبہ نئے ٹرالی بیگس کے استعمال نے پولیس کو شک میں مبتلا کیا جس کے بعد انہیں گرفتار کر لیا گیا۔
شندلیہ نے مزید بتایا کہ گزشتہ سال سے اب تک ریلوے پولیس نے 147 اسمگلرز کو گرفتار کیا، 2,327 کلو گانجہ ضبط کیا اور 116 مقدمات درج کئے۔ اب اسمگلنگ کے اہم سپلائر اور وصول کنندگان کے بارے میں مزید سراغ ملے ہیں جنہیں گرفتار کرنے کے لیے خصوصی ٹیمیں روانہ کی گئی ہیں۔
