حیدرآباد: آندھرا پردیش کے ضلع [en]Anakapalli[/en] میں پیر کی رات ایک المناک سڑک حادثے میں 3 افراد جاں بحق اور کئی دیگر زخمی ہو گئے، جب ایک تیز رفتار ٹرک نے لانکیلاپالم جنکشن کے قریب نیشنل ہائی وے پر اشارہ پر رکے ہوئے متعدد گاڑیوں کو روند ڈالا۔
پولیس کے مطابق ٹرک نے پہلے تین کاروں اور دس موٹر سائیکلوں کو ٹکر ماری، جس کے بعد ایک کنٹینر ٹرک سے جا ٹکرایا جو پینڈورتی کی سمت جا رہا تھا۔ ابتدائی تفتیش سے پتہ چلا ہے کہ حادثے کی وجہ ٹرک کے بریک فیل ہو جانا تھا۔
تین افراد موقع پر ہی دم توڑ گئے، جب کہ دیگر زخمیوں کو فوری طور پر انکاپلّی گورنمنٹ ہاسپٹل منتقل کیا گیا، جہاں ان کا علاج جاری ہے۔
تصادم کے نتیجے میں کئی گاڑیاں مکمل طور پر تباہ ہو گئیں یا بری طرح متاثر ہوئیں۔ اچانک پیش آئے اس حادثے سے مقامی آبادی اور راہگیروں میں خوف و ہراس پھیل گیا۔
