حیدرآباد: [en]New Ration Cards[/en] کی تقسیم کے سلسلے میں وزیراعلیٰ ریونت ریڈی نے پیر کے روز ضلع سوریاپیٹ کے تنگاترتی حلقہ اسمبلی میں واقع تیروملاگیری میں ایک بڑے جلسہ عام سے خطاب کیا۔ اس موقع پر ہزاروں مستحقین میں نئے راشن کارڈ تقسیم کیے گئے۔
اس پروگرام میں کانگریس کے سینئر قائدین اور ریاستی عہدیداروں نے شرکت کی، جن میں قانون ساز کونسل کے چیئرمین گُتّا سکھیندر ریڈی، اسپیکر اسمبلی پرساد کمار، پی سی سی صدر مہیش کمار گوڑ، وزراء اُتم کمار ریڈی، کومٹ ریڈی وینکٹ ریڈی، اڈلوری لکشمن اور پونگو لیٹی سرینواس ریڈی شامل تھے۔
اس کے علاوہ وزیراعلیٰ کے مشیر ویم نریندر ریڈی، رکن پارلیمان چمل کرن کمار ریڈی، سرکاری وہپ بیئرلا ایلیا، رکن اسمبلی منڈولا سیموئل، کئی ایم ایل ایز، ایم ایل سیز، ضلعی نمائندے اور اعلیٰ سرکاری عہدیدار بھی موجود تھے۔
وزیراعلیٰ نے اپنے خطاب میں کہا کہ راشن کارڈز کی فراہمی حکومت کے فلاحی عزائم کا حصہ ہے، جس کے تحت ہر مستحق خاندان کو ضروری سہولیات تک رسائی دی جا رہی ہے۔ انہوں نے وعدہ کیا کہ کانگریس حکومت عوامی بھلائی کے ہر منصوبے کو ترجیح دے گی اور غریبوں کے حقوق کی بھرپور حفاظت کرے گی۔
ریونت ریڈی نے عوام سے اپیل کی کہ وہ حکومت پر اعتماد رکھتے ہوئے ترقیاتی اسکیمات سے بھرپور فائدہ اٹھائیں۔ انہوں نے کہا کہ ریاستی حکومت ہر مستحق فرد تک فلاحی اسکیمات پہنچانے کے لیے پرعزم ہے۔
