حیدرآباد: [en]Mahabubnagar[/en] ریلوے اسٹیشن کے قریب جمعہ کے روز ایک مال گاڑی پٹری سے اتر گئی، جس کے نتیجے میں محبوب نگر -کرنول سیکشن پر ریل خدمات تقریباً تین گھنٹے تک متاثر رہیں۔
ریلوے حکام کے مطابق، رام گنڈم سے تمل ناڈو جانے والی اس ٹرین کے چھٹے ویگن کے پٹری سے اترنے پر لوکو پائلٹ نے فوری طور پر ٹرین کو روک دیا۔ واقعہ کے فوراً بعد ریلوے اسٹاف اور افسران جائے وقوعہ پر پہنچے اور مرمت کا کام شروع کر دیا۔
پٹری سے اترنے والے ویگن کو سائیڈ میں منتقل کیا گیا، تاہم اس دوران کئی ایکسپریس ٹرینیں متاثر ہوئیں، جن میں چینگال پٹّو ایکسپریس، ہندری ایکسپریس، میسور ایکسپریس، اور سیون ہلز ایکسپریس شامل ہیں۔ مسافروں کو کافی مشکلات کا سامنا کرنا پڑا۔
ریلوے حکام نے بتایا کہ ٹریک کی مرمت کا کام تیزی سے جاری ہے اور خدمات جلد بحال کر دی جائیں گی۔ حادثے کی وجہ جاننے کے لیے انکوائری کے احکامات جاری کیے گئے ہیں۔
