Hyderabad: Nizamabad district ke Bhainsa town mein ek 15 saal ke student ne PUBG addiction ke sabab khudkushi kar li. Yeh waqiya Anand Nagar Colony mein budh ki shaam ko hua. Police ke mutabiq, ladka online gaming ka shiddat se aadi ho gaya tha aur padhai mein dil na lagne ke sabab se mental stress mein tha.
Marhoom student ki shanakht Reshindra ke tor par hui hai jo Batti Santosh aur Sai Praja ka beta tha. Yeh family asal mein Hyderabad ke Moulali area ki rehne wali hai, magar karobari masroofiyat ki wajah se Bhainsa mein temporarily rehti thi. Reshindra ne recently 9th class complete ki thi aur Hyderabad ke ek school mein 10th class ke liye admission lene wala tha.
Relatives ke mutabiq, Reshindra kai mahino se usay PUBG khelne ki lat lag gayi thi. Parents ne kuch dino pehle uske gaming par pabandi lagayi taake uski tawajjo padhai par ho, magar wo pressure bardasht nahi kar saka aur apni jaan le li.
Uski laash ko local government hospital mein postmortem ke liye bheja gaya hai. Police ne parents ki complaint par case register karke tahqiqat ka aaghaz kar diya hai.
