حیدرآباد: انفورسمنٹ ڈائریکٹوریٹ نے اے پی مہیش کوآپریٹو اربن بینک کے سابق عہدیداروں کی مبینہ بے ضابطگیوں کی تحقیقات کے سلسلے میں 1.1 کروڑ روپئے مالیت کے اثاثہ جات کو ضبط کرلیا۔
منگل کے روز حیدرآباد زونل آفس کی جانب سے جاری بیان میں بتایا گیا کہ Mahesh Bank کے خلاف یہ کارروائی انسداد منی لانڈرنگ قانون 2002 کے تحت کی گئی۔ ضبط کی گئی جائیدادیں ضلع رنگا ریڈی کے ابراہیم پٹنم منڈل کے آدی بٹلہ گاؤں میں واقع ہیں۔
مہیش بینک بے ضابطگیوں پر ای ڈی کی کارروائی
ای ڈی نے کہا کہ یہ اثاثے روہت اساوا کے نام پر ہیں جو بینک کے سابق منیجنگ ڈائریکٹر و سی ای او اُمیش چند اساوا کے فرزند ہیں۔ تحقیقات کے مطابق قرضوں کی منظوری کے لیے 2 تا 4 فیصد کمیشن مبینہ طور پر وصول کیا جاتا تھا اور ان رقوم کو غیر منقولہ جائیدادیں خریدنے میں استعمال کیا گیا۔
ایجنسی نے مزید بتایا کہ اس معاملے میں پہلے ہی سابق چیئرمین رمیش کمار بانگ، اُمیش چند اساوا اور پُروشوتھم داس مندھن کے خلاف متعدد ایف آئی آر درج ہوچکی ہیں۔ تحقیقات ابھی جاری ہیں۔
