حیدرآباد: تلنگانہ کے چیف الیکٹورل آفیسر سی سدرشن ریڈی نے منگل کے روز ریاست کی نو غیر تسلیم شدہ سیاسی جماعتوں کو Show Cause Notices جاری کرتے ہوئے ہدایت دی کہ وہ وضاحت پیش کریں کہ انہیں الیکشن کمیشن آف انڈیا کے رجسٹر سے کیوں نہ خارج کیا جائے۔
12 اگست 2025 کو جاری ایک میمو میں، چیف الیکٹورل آفیسر نے حیدرآباد، میڑچل۔ملکاجگیری اور بھدرادری۔کوتہ گوڑم کے ڈسٹرکٹ الیکشن آفیسرز اور کلکٹرز کو ہدایت دی کہ یہ نوٹس متعلقہ جماعتوں کو پہنچائے جائیں۔ ان جماعتوں کو 25 اگست تک اپنے جوابات جمع کروانے ہوں گے، جو بعد میں سفارشات کے ساتھ نئی دہلی میں الیکشن کمیشن کو بھیجے جائیں گے۔
نو رجسٹرڈ غیر تسلیم شدہ سیاسی جماعتیں یہ ہیں: آل انڈیا آزاد کانگریس پارٹی (حیدرآباد)، آل انڈیا بی سی او بی سی پارٹی (میڑچل۔ملکاجگیری)، بی سی بھارت دیشم پارٹی (حیدرآباد)، بھارت لیبر پرجا پارٹی (بھدرادری۔کوتہ گوڑم)، لوک ستہ پارٹی (حیدرآباد)، مہاجنا منڈلی پارٹی (حیدرآباد)، نوا بھارت نیشنل پارٹی (میڑچل۔ملکاجگیری)، تلنگانہ پراگتی سمیتی (میڑچل۔ملکاجگیری)، اور تلنگانہ انڈیپنڈنٹ پارٹی (میڑچل۔ملکاجگیری)۔
ڈسٹرکٹ الیکشن آفیسرز کو یہ بھی ہدایت دی گئی ہے کہ ان جماعتوں کے نام قومی اور مقامی اخبارات میں شائع کیے جائیں اور سوشل میڈیا پر وسیع پیمانے پر تشہیر کی جائے۔
