حیدرآباد: تلنگانہ اور بالائی علاقوں میں مسلسل بارش کے باعث ریاست کے بڑے ذخائر آب لبریز ہوگئے ہیں جس پر حکام نے کئی Telangana Damsکے گیٹ کھول دیے۔ ناگرجنا ساگر، سری رام ساگر، سری پدا ایلّم پلی اور کالیشورم میں بھاری مقدار میں پانی کی آمد ریکارڈ کی گئی جبکہ بھدراچلم میں گوداوری ندی کا بہاؤ خطرناک حد تک بڑھ گیا۔
ناگرجنا ساگر میں حکام نے 26 گیٹ کھول کر 4.06 لاکھ کیوسکس پانی خارج کیا جبکہ وہاں 10 لاکھ کیوسکس پانی کی آمد ہورہی تھی۔ ذخیرے میں 294.55 ٹی ایم سی پانی محفوظ ہے، جب کہ اس کی مکمل گنجائش 312.04 ٹی ایم سی ہے۔
سری رام ساگر میں 2.75 لاکھ کیوسکس پانی کی آمد ریکارڈ ہوئی۔ دباؤ کو قابو میں رکھنے کے لیے 39 گیٹ کھولے گئے جن سے 4.03 لاکھ کیوسکس پانی چھوڑا گیا۔ یہاں سطح آب 1,089 فٹ تک پہنچ گئی جو کہ مکمل سطح 1,091 فٹ سے صرف دو فٹ کم ہے۔
سری پدا ایلم پلی میں سری رام ساگر کے اخراج کے باعث 40 گیٹ کھولے گئے اور 5.17 لاکھ کیوسکس سے زائد پانی خارج کیا گیا۔ کالیشورم میں 6.65 لاکھ کیوسکس پانی داخل ہوا اور اتنی ہی مقدار نچلی جانب چھوڑ دی گئی۔ سمکّا ساگر بیراج 82.60 میٹر تک بھر گیا جو کہ اس کی مکمل سطح 83 میٹر کے قریب ہے۔
بھدراچلم میں گوداوری ندی 43 فٹ تک پہنچنے پر پہلا سیلابی انتباہ جاری کردیا گیا۔ عقیدتمندوں کو ہدایت دی گئی کہ وہ ندی میں نہانے یا دیگر رسومات کے لیے داخل نہ ہوں۔
