حیدرآباد: بی جے پی کارپوریٹروں اور کارکنوں نے جمعرات کو تلنگانہ سیکریٹریٹ کے سامنے شدید احتجاج کرتے ہوئے گریٹر حیدرآباد میونسپل کارپوریشن حدود میں شہری سہولتوں کی ناکامی اور حالیہ برقی حادثات پر کارروائی کا مطالبہ کیا۔
یہ احتجاج “Save Hyderabad” کے نام سے شروع ہوا جو اس وقت شدت اختیار کرگیا جب پارٹی قائدین نے سیکریٹریٹ کی جانب مارچ کرنے کا اعلان کیا۔ پولیس نے صبح سویرے ہی کئی اہم بی جے پی قائدین، کارپوریٹروں اور کارکنوں کو گھروں میں نظر بند کردیا۔ اس کے باوجود کچھ قائدین سیکریٹریٹ کے دروازے تک پہنچنے میں کامیاب ہوگئے جس سے ماحول کشیدہ ہوگیا۔
احتجاجیوں نے مرکزی دروازے میں داخل ہونے کی کوشش کی لیکن پولیس نے انہیں روک دیا۔ اس دوران بی جے پی کارکنوں نے رکاوٹوں کو توڑنے کی کوشش کی جس پر جھڑپیں ہوئیں۔ پولیس نے کئی کارپوریٹروں کو حراست میں لے کر قریبی تھانوں کو منتقل کردیا۔
پارٹی قائدین نے ریاستی حکومت پر ناقص حکمرانی کا الزام عائد کرتے ہوئے کہا کہ خراب برقی لائنوں اور شہری مسائل کی لاپرواہی کے نتیجے میں قیمتی جانیں ضائع ہوئیں۔ انہوں نے حکومت سے براہ راست جواب اور فوری اصلاحی اقدامات کا مطالبہ کیا۔
