حیدرآباد:صنعت نگر کے جینکل واڑہ صنعتی علاقے میں جمعرات کی صبح ایک خوفناک آگ Fire Accidentبھڑک اٹھی، جس نے ڈیورڈائن انڈسٹریز کو بری طرح اپنی لپیٹ میں لے لیا اور پورے علاقے میں گھنا دھواں پھیل گیا۔
یہ واقعہ صبح تقریباً 3:30 بجے پیش آیا، جب فیکٹری کے اندر اچانک آگ بھڑک اُٹھی اور چند منٹوں میں پوری عمارت شعلوں کی زد میں آ گئی۔ بلند ہوتے سیاہ دھوئیں کے بادل دور دور تک دیکھے گئے جس سے مقامی آبادی میں خوف و ہراس پھیل گیا۔
فائر ڈپارٹمنٹ نے فوری کارروائی کرتے ہوئے چھ فائر انجن اور ایک روبوٹک فائر فائٹنگ یونٹ جائے وقوعہ پر روانہ کیا۔ عملے نے کئی گھنٹوں کی مسلسل جدوجہد کے بعد آگ پر قابو پایا۔
اگرچہ واقعہ میں کسی جانی نقصان کی اطلاع نہیں ملی، لیکن فیکٹری کو شدید مالی نقصان پہنچا ہے۔ حکام نے آگ کی اصل وجہ کی تصدیق نہیں کی ہے، تاہم ابتدائی شبہ شارٹ سرکٹ پر ظاہر کیا جا رہا ہے۔
واقعہ کی تحقیقات جاری ہیں۔
