Hyderabad: Reserve Bank of India (RBI) ne kaha hai ke GST Reforms mulk ke liye derpa faide paida karengi, jin mein business mein asani, consumers ke liye kam qeemat aur consumption mein izafa shamil hai. Yeh baat budh ke din jaari ki gayi RBI ke September Bulletin mein samne aayi.
Bulletin ke mutabiq, 3 September ko hone wale GST Council ke ijlaas mein liye gaye faislon ne structural reforms ka rasta humwar kiya. RBI ka kehna hai ke naya tax framework rate aur process ko simplify karta hai aur public needs aur administrative efficiency ke darmiyan balance qaim karta hai.
Business aur awaam ke liye faide
Central bank ne is baat ki nishandahi ki ke ziada tar essential cheezon par ab ya to GST nahi hai ya sirf 5% tax lagta hai. GST Reforms ke zariye inverted duty structure ka masla hal kiya gaya hai aur business-friendly initiatives introduce kiye gaye hain, jaise easy registration, fast refunds aur low compliance costs. In se chhoti industries aur startups ko khaas faida hoga.
RBI ne yeh bhi kaha ke yeh reforms tax collection ko stable banayenge, compliance ko improve karenge aur na sirf ease of living balki ease of doing business ko bhi promote karenge.
Maashi soorat-e-haal aur global factors
Bulletin mein yeh bhi likha gaya ke aanay wale tyohaar ke mausam mein passenger vehicles ki sales barhne ki umeed hai, jis ki wajah GST mein kami hai. Saath hi report ne US trade policies aur developed economies ke financial issues ko global uncertainty ka sabab qarar diya.
RBI ne kaha ke Indian economy ne resilience dikhaya hai aur financial year ki pehli quarter mein domestic demand ki wajah se pichle paanch quarters ki sabse unchi growth rate record hui. Inflation mein halka sa izafa zaroor hua, magar yeh 7th mahine bhi target se neeche raha. Liquidity ki wafar miqdaar ne interest rates ke effects ko economy tak pohanchane mein madad di.
Bulletin ne yeh bhi highlight kiya ke equity markets mein August aur September ke darmiyan volatility rahi aur prices dono taraf gaye.
