حیدرآباد: Phone Tappingکیس کے سلسلے میں تلنگانہ حکومت نے سپریم کورٹ سے درخواست کی ہے کہ اسے اسٹیٹس رپورٹ داخل کرنے کے لیے مزید وقت دیا جائے۔ عدالت نے یہ مہلت منظور کرتے ہوئے سماعت 25 اگست تک ملتوی کر دی۔
یہ مقدمہ ریٹائرڈ آئی پی ایس افسر ٹی. پربھاکر راؤ سے متعلق ہے، جنہیں اس معاملے میں کلیدی ملزم نامزد کیا گیا ہے۔ عدالت نے انہیں 29 مئی کو قبل از گرفتاری ضمانت دی تھی اور ریاستی حکومت کو ہدایت دی تھی کہ آئندہ سماعت سے قبل تفصیلی اسٹیٹس رپورٹ پیش کی جائے۔
منگل کے روز جسٹس بی وی ناگراتنا اور جسٹس کے وی وشواناتھن پر مشتمل دو رکنی بینچ نے اس مقدمے کی سماعت کی۔ ریاست کی طرف سے سینئر وکیل سدھارتھ لتھرا نے عدالت سے مزید وقت کی درخواست کی تاکہ رپورٹ کو مکمل اور پیش کیا جا سکے۔
عدالت نے درخواست قبول کرتے ہوئے واضح کیا کہ پربھاکر راؤ کو دی گئی عبوری ضمانت آئندہ سماعت یعنی 25 اگست تک برقرار رہے گی۔
