حیدرآباد: شہر کے پوش علاقہ بنجارہ ہلز میں کام کرنے والے ایک نوجوان مالی نے مبینہ طور پر Online Gaming میں 5 سے 6 لاکھ روپئے کا نقصان اٹھانے کے بعد ذہنی دباؤ کے تحت خودکشی کر لی۔
متوفی کی شناخت وینکٹیش کے طور پر کی گئی ہے، جو ضلع محبوب نگر کے جکلیر گاؤں کا رہنے والا تھا اور حیدرآباد میں مالی کے طور پر ملازم تھا۔ ذرائع کے مطابق وینکٹیش حالیہ دنوں میں آن لائن گیمنگ کا شدید عادی ہو چکا تھا، اور اکثر کام کے دوران بھی گیمز کھیلتا رہتا تھا۔
ذرائع کا کہنا ہے کہ مسلسل مالی نقصان اور ذہنی دباؤ نے اسے شدید مایوسی میں مبتلا کر دیا۔ اسی کرب میں اُس نے کام کی جگہ پر کوئی زہریلا مادہ پی لیا اور چند لمحوں بعد بے ہوش ہو کر گر پڑا۔
اسے فوری نیم بے ہوشی کی حالت میں نظام انسٹیٹیوٹ آف میڈیکل سائنسز (نِمز) منتقل کیا گیا، مگر ڈاکٹروں نے اُسے مردہ قرار دیا۔
یہ واقعہ ایک بار پھر آن لائن گیمنگ کے خطرناک اثرات اور ذہنی صحت پر اس کے اثرات پر سوال اٹھا رہا ہے۔ ماہرین کا کہنا ہے کہ ایسے کیسز میں فوری کونسلنگ اور نفسیاتی مدد فراہم کی جانی چاہیے تاکہ نوجوانوں کو بروقت بچایا جا سکے۔
