حیدرآباد: تلنگانہ کے ضلع Nagar Kurnoolکے رایاورم گاؤں میں ایک شخص نے اپنی بیوی کو بے رحمی سے قتل کر دیا۔ پولیس کے مطابق شری شیلم نے اپنی 27 سالہ بیوی شراونی پر ناجائز تعلقات کا شبہ کرتے ہوئے اس کا گلا گھونٹ کر قتل کر دیا اور پھر لاش کو جنگل میں جلا دیا۔ بعد میں وہ خود پولیس کے پاس پہنچ کر سرینڈر ہوگیا۔
تفصیلات کے مطابق شری شیلم اور شراونی (متوطن گوٹّور، ضلع محبوب نگر) کی ملاقات 2014 میں ایک “رینج نمبر” فون کنکشن کے ذریعہ ہوئی تھی۔ بات چیت کا یہ سلسلہ تعلقات میں بدلا اور دونوں نے شادی کرلی۔ ان کے ایک بیٹا اور ایک بیٹی ہے۔
تاہم شادی کے کچھ عرصے بعد ہی شراونی اپنے شوہر اور بچوں کو چھوڑ کر اپنے دیور کے ساتھ رہنے لگی۔ تقریباً ایک سال قبل وہ دوبارہ سسرال واپس آئی اور شوہر نے اسے قبول کر لیا۔ لیکن اس کے باوجود دونوں کے درمیان جھگڑے بڑھتے گئے۔ شری شیلم کو شبہ تھا کہ شراونی کسی اور شخص سے فون پر رابطہ کر رہی ہے اور تعلقات جاری رکھے ہوئے ہے۔
ان ہی شبہات اور بار بار کے جھگڑوں کے بعد شری شیلم نے اپنی بیوی کو قتل کرنے کی منصوبہ بندی کی۔ اس نے اسے سوماشیلا لے جانے کے بہانے موٹر سائیکل پر بٹھایا اور پیداکوٹہ پلی منڈل کے ستھا پور کے قریب جنگل میں کستوری سیب جمع کرنے کے بہانے لے گیا۔ وہاں اس نے تولیہ سے شراونی کا گلا گھونٹا اور اپنے پاس موجود چھری سے کئی وار کئے۔ قتل کے بعد اس نے پٹرول ڈال کر لاش کو آگ لگادی اور وہاں سے فرار ہوگیا۔
شراونی کے والد کی طرف سے لاپتہ شکایت درج کرائے جانے کے بعد پولیس نے تفتیش شروع کی۔ اسی دوران شری شیلم نے پولیس اسٹیشن میں خودسپردگی اختیار کرتے ہوئے جرم کا اعتراف کیا۔
