حیدرآباد: Indiramma Housingاسکیم کے تحت بھدرادری کوتہ گوڑم ضلع کے قبائلی خاندانوں کو نئے مکانات فراہم کیے جارہے ہیں، جہاں وزیر اعلیٰ اے. ریونت ریڈی آج بندلاپاڈو گاؤں میں تعمیر شدہ گھروں کا افتتاح کریں گے۔
سرکاری شیڈول کے مطابق وزیر اعلیٰ دوپہر 2:20 بجے ہیلی کاپٹر کے ذریعہ بندلاپاڈو پہنچیں گے۔ وہ مستفیدین بچلا نرسماں اور بچلا رمناں کے مکانات میں ہاؤس وارمنگ تقریب میں شرکت کریں گے، دیگر خاندانوں سے ملاقات کریں گے اور Indiramma Housingمنصوبے کی یادگار پائلن کی نقاب کشائی کریں گے۔ اس کے بعد وہ دامرچرلہ میں عوامی جلسے سے خطاب کریں گے۔
بندلاپاڈو میں اندرماں ہاؤسنگ کی پیش رفت
ریاستی حکومت نے بندلاپاڈو کو اس ہاؤسنگ اسکیم کے پائلٹ پروجیکٹ کے طور پر منتخب کیا۔ چندروگنڈہ منڈل میں منظور شدہ 968 مکانات میں سے 310 اس گاؤں کو الاٹ کیے گئے ہیں۔ تعمیرات تیزی سے جاری ہیں، 58 مکانات سلاب لیول تک، 86 چھت ڈالنے کے مرحلے میں اور 150 بنیاد کے مرحلے پر ہیں۔ عہدیداروں کے مطابق بندلاپاڈو نے قلیل عرصے میں سب سے زیادہ تعمیرات مکمل کی ہیں، جو تلنگانہ بھر میں ایک ریکارڈ ہے۔
وزیر ہاؤسنگ پونگلیٹی سرینواس ریڈی نے منگل کے روز انتظامات کا جائزہ لیتے ہوئے وزیر اعلیٰ کے ایک دور دراز قبائلی گاؤں کے دورے کو ایک تاریخی لمحہ قرار دیا۔ انہوں نے کہا کہ یہ اسکیم مکمل شفافیت کے ساتھ نافذ کی جارہی ہے اور کسی بھی بے ضابطگی پر سخت کارروائی کی جائے گی۔
وزیر اعلیٰ ریونت ریڈی کا محبوب نگر کا دورہ
بھدرادری کے پروگرام سے قبل ریونت ریڈی ضلع محبوب نگر کے دیوراکدرا حلقے کا دورہ کریں گے، جہاں وہ موسیٰ پیٹ منڈل میں کارننگ ٹیکنالوجیز یونٹ کا افتتاح کریں گے اور اہم پارٹی کارکنوں سے ملاقات کریں گے۔ وزیر اعلیٰ صبح 11 بجے بیگم پیٹ سے محبوب نگر کے لیے روانہ ہوں گے اور بعد ازاں بھدرادری کا سفر کریں گے۔
