حیدرآباد: انڈیا میٹرولوجیکل ڈپارٹمنٹ (آئی ایم ڈی) نے تلنگانہ کے لئے IMD Red Alertجاری کیا ہے اور پیش گوئی کی ہے کہ ریاست کے کئی حصوں میں کل تک شدید سے انتہائی شدید بارشیں ہوسکتی ہیں۔
یہ الرٹ اس وقت جاری کیا گیا جب مانسون کی سرگرمیوں میں اضافہ ہوا ہے۔ اوڈیشہ، چھتیس گڑھ، کوسٹل آندھرا پردیش، مدھیہ مہاراشٹرا، کیرالہ اور کوسٹل کرناٹک میں بھی شدید بارش کی توقع ظاہر کی گئی ہے۔ شمال مغربی ہندوستان میں آئندہ چھ تا سات دنوں تک مسلسل بارش کے امکانات ہیں۔
ریڈ الرٹ تلنگانہ: جموں میں 70 سال کا ریکارڈ ٹوٹا
آکاشوانی نیوز سے بات کرتے ہوئے آئی ایم ڈی کے سینئر سائنس داں ڈاکٹر آر کے جینامانی نے بتایا کہ جموں کے چند مقامات پر گزشتہ 24 گھنٹوں میں غیر معمولی بارش ریکارڈ کی گئی جس نے 70 سالہ پرانا ریکارڈ توڑ دیا۔ جموں و کشمیر کے لئے آج یلو وارننگ جاری کی گئی ہے۔
اس کے علاوہ، تلنگانہ کے ریڈ الرٹ کے ساتھ اوڈیشہ اور آندھرا پردیش کے لئے اورنج الرٹ جاری کیا گیا ہے۔ آئی ایم ڈی نے متاثرہ ریاستوں کے حکام اور شہریوں کو محتاط رہنے اور ضروری احتیاطی تدابیر اختیار کرنے کی ہدایت دی ہے۔
