حیدرآباد: تلنگانہ کے ڈائریکٹر جنرل آف پولیس (ڈی جی پی) جیتندر نے جمعرات کو کہا کہ ریاست میں موسلا دھار بارش کے سبب پولیس اور راحتی ادارے ہائی الرٹ پر ہیں اور اب تک ایئر فورس، فوج، ایس ڈی آر ایف اور این ڈی آر ایف کی مدد سے تقریباً 2000 افراد کو محفوظ مقامات پر منتقل کیا گیا ہے۔
اے بی این۔آندھرا جوتی سے بات کرتے ہوئے ڈی جی پی نے بتایا کہ دو ہیلی کاپٹر Flood Rescueآپریشن کے لیے تعینات کیے گئے ہیں اور ضرورت پڑنے پر مزید ہیلی کاپٹر بھی طلب کیے جائیں گے۔ انہوں نے کہا کہ ریاستی ڈیزاسٹر ریسپانس فورس (ایس ڈی آر ایف) کے تقریباً 2000 اہلکار متحرک کیے گئے ہیں اور یہ ٹیمیں جان بچانے میں این ڈی آر ایف کی طرح مؤثر کارکردگی دکھا رہی ہیں۔
ایس ڈی آر ایف کی موجودہ راحتی سرگرمیوں میں نمایاں خدمات
انہوں نے کہا کہ گذشتہ برس قائم کی گئی ایس ڈی آر ایف موجودہ راحتی سرگرمیوں میں نمایاں خدمات انجام دے رہی ہے۔ تمام اضلاع کے سپرنٹنڈنٹ آف پولیس کو ہدایت دی گئی ہے کہ وہ فیلڈ میں رہیں اور مقامی انتظامیہ کے ساتھ قریبی تال میل رکھیں۔ حیدرآباد میں اسٹیٹ کمانڈ کنٹرول سینٹر صورتحال پر مسلسل نظر رکھے ہوئے ہے اور بروقت کارروائی کے لیے ہدایات جاری کر رہا ہے۔
ڈی جی پی نے زور دیا کہ اگرچہ ونائک چوتھی تقاریب جاری ہیں لیکن پولیس محکمے کی اولین ترجیح سیلاب سے متاثرہ عوام کی جانیں بچانا ہے۔
انہوں نے بتایا کہ کاماریڈی اور سدی پیٹ اضلاع سب سے زیادہ متاثر ہیں جہاں کئی اہم سڑکیں سیلابی پانی سے ٹوٹ گئی ہیں۔ ایک ریلوے پٹری بھی مکمل طور پر بہہ گئی ہے جس سے آمدورفت متاثر ہوئی ہے۔ جیتندر نے کہا کہ ریلویز اور محکمہ آبپاشی کے ساتھ مل کر آمدورفت کی بحالی اور مزید خطرات کو روکنے کے اقدامات کیے جا رہے ہیں۔
حیدرآباد کے بارے میں انہوں نے کہا کہ اگرچہ گذشتہ رات بارش ہوئی لیکن شہر میں بڑے پیمانے پر کوئی رکاوٹ نہیں ہے۔ تاہم شہری سیلاب سے نمٹنے کے لیے راحتی ٹیمیں اور پولیس اہلکار ہر وقت تیار ہیں۔ انہوں نے کہا کہ ہم ہر ممکن صورتحال کے لیے تیار ہیں۔
