حیدرآباد: حکومت کے وہِپ آدی سرینواس نے اعلان کیا ہے کہ BC Reservationکے لیے کانگریس کی جدوجہد اُس وقت تک جاری رہے گی جب تک متعلقہ بل کو آئین کے نویں شیڈول میں شامل نہیں کیا جاتا۔
دہلی کے جنتر منتر پر ہونے والے احتجاج سے قبل آدی سرینواس نے کہا کہ تلنگانہ کانگریس نے مرکز پر دباؤ ڈالنے کے لیے اب براہ راست عملی جدوجہد کا آغاز کر دیا ہے۔ انہوں نے واضح کیا کہ سیاست، تعلیم، روزگار اور فلاحی اسکیمات میں پسماندہ طبقات کے لیے 42 فیصد ریزرویشن کا حصول پارٹی کا مرکزی مطالبہ ہے۔
اس احتجاج کے سلسلے میں وزیر اعلیٰ ریونت ریڈی، پردیش کانگریس صدر مہیش کمار گوڑ، اور آل انڈیا کانگریس کمیٹی کی انچارج میناکشی نٹراجن پہلے ہی دہلی پہنچ چکے ہیں۔ ریاست کے مختلف اضلاع سے پارٹی قائدین اور بی سی تنظیموں کے رہنما خصوصی ٹرین کے ذریعے دہلی روانہ ہوئے تاکہ مظاہرے میں شرکت کر سکیں۔
آدی سرینواس کے مطابق اس تحریک کو کئی پسماندہ طبقات کی تنظیموں اور غیر سرکاری اداروں کی حمایت بھی حاصل ہو چکی ہے، جو کانگریس کے کوٹہ میں توسیع کے مطالبے کی تائید کر رہے ہیں۔
