حیدرآباد: [en]Chandrayangutta Murder[/en] کیس میں پولیس نے ایک 18 سالہ نوجوان کو گرفتار کیا ہے، جس پر الزام ہے کہ اس نے گانجہ کے غیر قانونی کاروبار سے جڑے جھگڑوں، ہراسانی اور پیسے کے مطالبے سے تنگ آکر ایک کیب ڈرائیور کو بے رحمی سے قتل کر دیا۔
متوفی کی شناخت محمد عبدالعزیز عرف اثر (عمر 24 سال) کے طور پر کی گئی ہے، جس کی لاش بالا پور 100 فٹ روڈ پر واقع Zepto اسٹور کے پیچھے ملی۔ ملزم محمد یوسف عرف گلّو، حفیظ بابا نگر کا رہائشی ہے۔
پولیس کے مطابق مقتول اور ملزم دونوں ایک ہی علاقے سے تعلق رکھتے تھے اور بچپن کے ساتھی تھے۔ اثر نے یوسف کو گانجہ فروشی میں ملوث کیا اور وقتاً فوقتاً کچھ رقم دیا کرتا تھا۔ لیکن وقت کے ساتھ ساتھ اثر نے نہ صرف یوسف کو جسمانی طور پر مارنا پیٹنا شروع کیا بلکہ اس سے رقم بھی زبردستی لینے لگا اور منشیات کیس میں پھنسانے کی دھمکیاں دینے لگا۔
ملزم یوسف نے بار بار کی اس ہراسانی سے تنگ آکر قتل کا منصوبہ بنایا۔ اس نے چند روز قبل ایک دوست کی مدد سے چاقو حاصل کیا۔ 11 جولائی کو اُس نے اثر کو Zepto اسٹور کے پیچھے ایک سنسان مقام پر بلایا، یہ کہہ کر کہ وہاں سونا چھپایا گیا ہے۔ موقع پر پہنچنے کے بعد یوسف نے پہلے پتھر سے وار کیا اور پھر چاقو سے متعدد مرتبہ حملہ کر کے اظہر کو موقع پر ہی ہلاک کر دیا۔
قتل کے بعد یوسف سیدھے اپنے گھر واپس گیا، چاقو اور خون آلود کپڑے چھپائے، نہایا اور شک سے بچنے کے لیے مولاپور میں اپنے والد کے گھر چلا گیا۔
چندرائن گٹہ پولیس نے انسپکٹر آر گوپی کی قیادت میں، اے سی پی اے سدھاکر اور ایڈیشنل ڈی سی پی کے شری کانت کی نگرانی میں تیزی سے تحقیقات کرتے ہوئے ملزم کو گرفتار کر لیا۔
پولیس کمشنر ایس چیتنیا کمار، آئی پی ایس، نے ٹیم کی ستائش کرتے ہوئے کامیاب تحقیقات پر انعام دینے کا اعلان کیا ہے۔ یہ واقعہ نوجوانوں میں منشیات کے بڑھتے اثرات اور مجرمانہ ذہنیت کی سنگینی کو اجاگر کرتا ہے۔
