حیدرآباد ۔ تلنگانہ اسٹیٹ بورڈ آف انٹرمیڈیٹ ایجوکیشن نے اعلان کیا ہے کہ آئندہ تعلیمی سال سے نیا نصاب نافذ کیا جائے گا۔ انٹر بورڈ کے سکریٹری کرشنا آدتیہ نے بتایا کہ اصلاحات میں نندن نیلکنی کی ایک اسٹیپ فاؤنڈیشن کے تعاون سے AI Classes کا آغاز اور فزکس والا کے ذریعے نیٹ، جے ای ای اور سی ایل اے ٹی کی کوچنگ شامل ہے۔
انہوں نے مزید کہا کہ سرکاری کالجوں میں 494 خالی لکچرر اسامیوں کو پر کرنے کی تجاویز تیار کر کے مالی منظوری کے لیے روانہ کی گئی ہیں اور جلد ہی منظوری ملنے کی توقع ہے۔ بدھ کے روز انٹر بورڈ آفس میں میڈیا بریفنگ کے دوران انہوں نے ان پروگراموں کی تفصیل پیش کی جو چیف منسٹر کی ہدایت پر انٹرمیڈیٹ تعلیم کو مضبوط بنانے کے لیے نافذ کیے جا رہے ہیں۔ اس موقع پر انہوں نے یہ بھی کہا کہ سرکاری جونیر کالجوں میں مڈ ڈے میل اور یونیفارم فراہم کیے جائیں گے جیسا کہ سرکاری اسکولوں میں ہوتا ہے۔
سی سی ٹی وی نگرانی اور والدین کی میٹنگیں
کرشنا آدتیہ نے بتایا کہ ریاست بھر کے کالجوں میں پہلے ہی 5,500 سی سی ٹی وی کیمرے کمانڈ کنٹرول روم کے ذریعے نصب کیے جا چکے ہیں۔ نومبر سے ڈیجیٹل اسکرینیں تقسیم کی جائیں گی تاکہ AI Classes چلائی جا سکیں۔ حاضری کو بہتر بنانے کے لیے چہرہ شناسی نظام کو مزید سخت بنایا جائے گا جس کے تحت طلبہ غیر حاضری کی صورت میں والدین کو فوری اطلاع ملے گی اور پرنسپل ان سے براہ راست رابطہ کریں گے۔ یہ نظام دسہرہ کے بعد مکمل طور پر نافذ کیا جائے گا۔
اسی دوران انٹر بورڈ 26 ستمبر سے ریاست گیر سطح پر والدین کی بڑی میٹنگوں کا انعقاد کرے گا۔ حکام نے منصوبہ بنایا ہے کہ ان اجلاسوں میں کامیاب سابق طلبہ اپنے تجربات موجودہ طلبہ کے ساتھ بانٹیں گے۔ مزید برآں، ہر ضلع میں ایک سوشل میڈیا سیل قائم کیا جائے گا تاکہ بر وقت معلومات فراہم کی جا سکیں۔
امتحانات اور حفاظتی اقدامات
سکریٹری نے مزید کہا کہ تمام پریکٹیکل امتحانات سی سی ٹی وی کی نگرانی میں لیے جائیں گے اور نجی کالجوں کو ہدایت دی گئی ہے کہ وہ کیمرے لازمی نصب کریں۔ انہوں نے واضح کیا کہ اس سال انٹرمیڈیٹ پریکٹیکلز پر جمبلنگ سسٹم کا اطلاق نہیں ہوگا۔
