حیدرآباد: ملازمت کے خواہشمند نوجوانوں کو Fake Job Offersدے کر دھوکہ دینے والے ایک عادی جعلساز کو حیدرآباد پولیس نے گرفتار کر لیا۔
گنی گوپی، عمر 30 سال، کا تعلق آندھرا پردیش کے ضلع سریکاکولم کے ماری پادو علاقے سے ہے۔ وہ حیدرآباد کے اپل علاقے میں واقع سافٹ ویئر کمپنی Lenssoft India Pvt Ltd کا فرضی ریکروٹر بن کر لوگوں کو ملازمت کا جھانسہ دے رہا تھا۔
گوپی نے گزشتہ چند مہینوں کے دوران درجنوں امیدواروں کو کمپنی کے جعلی لوگو اور دستخط کے ساتھ تیار کردہ تقرری خطوط جاری کیے اور ہر امیدوار سے بھاری رقم وصول کی۔
یہ دھوکہ اس وقت بے نقاب ہوا جب کئی امیدوار کمپنی کے دفتر پہنچ گئے اور اپنے تقرری مکتوبات دکھائے۔ کمپنی کے عملے نے جب اس کی چھان بین کی تو فوری طور پر اپل پولیس کو اطلاع دی۔
تحقیقات کے دوران معلوم ہوا کہ گوپی اس سے پہلے بھی کئی ریاستوں میں فرضی ملازمت اسکیموں میں ملوث رہ چکا ہے۔ اس پر مختلف پولیس اسٹیشنوں میں مقدمات درج ہیں اور وہ پہلے بھی جیل کی سزا کاٹ چکا ہے۔
پولیس نے ملزم کو گرفتار کر کے عدالتی حراست میں بھیج دیا ہے اور عوام سے اپیل کی ہے کہ وہ ملازمت کے جھانسے میں آ کر کسی کو پیسے نہ دیں اور اس قسم کی سرگرمیوں کی فوری اطلاع پولیس کو دیں۔
