حیدرآباد: تلنگانہ حکومت نے اعلان کیا ہے کہ پولی سیٹ انٹرنس امتحان کے ذریعہ ڈپلوما کورسز میں داخلہ لینے والے سرکاری، ضلع پریشد، گُرُکل اور جواہر نوودیا اسکولوں کے طلبہ کی ٹیوشن فیس مکمل طور پر Fee Reimbursement اسکیم کے تحت واپس کی جائے گی۔
محکمہ ویلفیئر کے اسپیشل چیف سکریٹری شری دھر کی جانب سے جاری کردہ سرکاری احکام میں واضح کیا گیا ہے کہ پولی سیٹ میں ٹاپ 1,000 رینک حاصل کرنے والے طلبہ کو، چاہے وہ کسی بھی اسکول سے تعلق رکھتے ہوں، مکمل فیس بازادائیگی دی جائے گی۔ یہ اقدام داخلوں کے عمل میں جاری تعطل کو ختم کرنے کے لیے کیا گیا، جس کی وجہ سے نشستوں کی الاٹمنٹ دس دن سے رکی ہوئی تھی۔
داخلہ کنوینر شری دیوا سینا کے مطابق، منگل کو پہلے مرحلے کی الاٹمنٹ جاری کی گئی، جس میں 18,984 طلبہ کو نشستیں الاٹ ہوئیں۔ منتخب امیدواروں کو 18 جولائی تک فیس ادا کر کے آن لائن سیلف رپورٹنگ مکمل کرنی ہوگی۔ کالج میں جسمانی رپورٹنگ صرف دوسرے مرحلے کی کونسلنگ کے بعد ضروری ہوگی۔
حکومت نے ڈپلوما فیس کی حد کو 14,900 روپئے سے بڑھا کر 39,000 روپئے کر دیا ہے، جس کی بنیاد پر نئی بازادائیگی پالیسی بھی جاری کی گئی ہے۔ ایس سی، ایس ٹی، اور اقلیتی طلبہ کو ان کی رینک سے قطع نظر مکمل فیس بازادائیگی دی جائے گی، جب کہ دیگر طلبہ کو زیادہ سے زیادہ 14,900 روپئے کی رعایت حاصل ہوگی۔
پہلے مرحلے کے بعد بھی کل 10,012 نشستیں خالی رہ گئی ہیں۔ البتہ پانچ سرکاری اور ایک خانگی پولی ٹیکنک کالج کی تمام نشستیں مکمل طور پر پُر ہو چکی ہیں۔ حکام نے طلبہ کو مشورہ دیا ہے کہ وہ مقررہ تاریخ سے قبل تمام رسمی کارروائیاں مکمل کر لیں تاکہ ان کا داخلہ برقرار رہے۔
