حیدرآباد: تلنگانہ کے وزیر اعلیٰ [en]Revanth Reddy[/en] آج دہلی کے دو روزہ دورے پر روانہ ہو رہے ہیں جہاں وہ مرکزی وزراء اور کانگریس کی اعلیٰ قیادت سے ملاقاتیں کریں گے۔
چیف منسٹر آفس کی جانب سے مختلف مرکزی وزراء سے وقت مانگا گیا ہے۔ ریونت ریڈی کے دہلی دورے کا مقصد حیدرآباد میٹرو ریل فیز 2 کی تفصیلی منصوبہ رپورٹ (ڈی پی آر) اور ریجنل رنگ روڈ کی تعمیر کے لیے مرکزی حکومت کی منظوری اور تعاون حاصل کرنا ہے۔
وزیر اعلیٰ، مرکزی وزیر صحت جے پی نڈا سے بھی ملاقات کریں گے تاکہ ریاست میں یوریا اور دیگر کھادوں کی قلت کے مسئلے پر گفتگو ہو سکے۔ وہ موجودہ خریف فصل کے پیش نظر ریاست کے لیے فوری کھاد کوٹہ جاری کرنے کی اپیل کریں گے۔
راشن کارڈ تقسیم مہم کے تحت ریونت ریڈی 14 جولائی کو ضلع سوریہ پیٹ کے تنگاتورتی حلقہ کے تروملگیری میں ایک عوامی جلسے سے خطاب کریں گے۔ کانگریس قائدین راہول گاندھی اور پرینکا گاندھی کو اس تقریب میں شرکت کی دعوت دی جا رہی ہے۔
دہلی دورے کے دوران وزیر اعلیٰ کانگریس ہائی کمان کو پارٹی کے اندرونی اختلافات، نامزد عہدوں کی صورتحال اور ریاستی حکومت کی ترقی و فلاحی اسکیمات پر پیش رفت کی تفصیلات بھی فراہم کریں گے۔
علاوہ ازیں، ریاستی حکومت کی جانب سے 12 سے 18 جولائی تک منعقد ہونے والے ’اندرا مہیلا شکتی‘ ہفتہ کی تفصیلات بھی پارٹی قیادت کو دی جائیں گی۔
ریونت ریڈی کے منگل کی شب حیدرآباد واپسی کی توقع ہے۔
